ԵՐԵՎԱՆ, 29 ապրիլի –Sputnik. Սոցցանցերի թուրք օգտատերերը փորձում են հալածել ամերիկահայ հեռուստաաստղ Քիմ Քարդաշյանին 1915 թվականին Օսմանյան կայսրությունում տեղի ունեցած Հայոց ցեղասպանության զոհերի հիշատակի օրվան նվիրված գրառման համար։ Ռեալիթի շոուի աստղի Instagram-ի սթորիզում հրապարակված լուսանկարները փաստագրական վկայություններն ենՀայոց ցեղասպանության։ Լուսանկարներին կից Ցեղասպանության մասին հակիրճ տեղեկություններ էին տեղադրված։
«1915 թվականի ապրիլի 24-ին սկսվեց կոտորածը։ Սկզբում սպանվեցին հայ մտավորականները։ Այնուհետև օսմանյան թուրքերն անցան կանանց ու երեխաներին։ Նրանք իմ նախնիներն են, որոնց սովի են մատնել, բռնաբարել և սպանել են։ 1917 թվականին սպանվել էր արդեն 1.5 մլն հայ»,– գրված էր Քիմի սթորիզում։
Mulierlife ամերիկյան պարբերականը գրում է, որ այս հրապարակումից հետո ավելի քան հազար օգտատերեր բողոք են ներկայացրել Instagram–ի ադմինիստրացիա, որի հետևանքով սոցցանցը հեռացրել է Քարդաշյանի սթորիզը և հեռուստաաստղին մեղադրել «ռասիզմի» մեջ։
Ավելին, թուրք օգտատերերը Քիմի կենցաղային լուսանկարների ու սելֆիների տակ մասսայաբար տեղադրել են Թուրքիայի դրոշը։
Քիմ Քարդաշյանին «ապաստարանը» չփրկեց. Նորթը հայտնվեց մոր դիմահարդարման տեսանյութում
Քարդաշյանին փորձում են հետապնդել նաև թուրք հայտնիները, որոնց մեկնաբանությունները մի քանի հազար լայք են հավաքում։ Նրանց թվում են Թուրքիայում հայտնի երգչուհի Դեմետ Աքալընն ու դերասան Թուրգայ Բայդուրը։
«Ես Թուրքիայից եմ և հպարտանում եմ դրանով», – գրել է թուրք դերասանը Քարդաշյանի լուսանկարի տակ։
Թուրքական ԶԼՄ–ներում տեղեկություն էր տարածվել, որ Քարդաշյանի էջը կոտրել են թուրք հաքերները, սակայն նման հետքեր Քիմի էջում չկան։
Քիմի հայրը փաստաբան Ռոբերտ Քարդաշյանն է, որը մահացել է 2003 թվականին։ Ռոբերտ և Թոմ Քարդաշյանները Արթուր Քարդաշյանի և Հայկուհի (Հելեն) Քարդաշյանի որդիներն են: Արթուրի և Հայկուհու ծնողները XX դարի սկզբին Էրզրումից և Թուրքիայի Կարա շրջանից գաղթել են ԱՄՆ: Քիմն իր ազգանունը ժառանգել է մեծ հորից՝ Սաղաթել Քարդաշյանից:
2015 թվականի ապրիլին Քարդաշյանն այցելել էր Հայաստան` մասնակցելու Հայոց ցեղասպանության 100-րդ տարելիցին նվիրված միջոցառումներին։ 2019 թվականին նա Երևան ժամանեց` ՏՏ համաշխարհային համաժողովի (WCIT 2019) շրջանակում։
Այդ ուղևորությունների ժամանակ Քիմն այցելել էր Հայոց ցեղասպանության զոհերի հիշատակը հավերժացնող «Ծիծեռնակաբերդի» հուշահամալիր։