ԵՐԵՎԱՆ, 25 ապրիլի — Sputnik. ՀՀ-ում ՌԴ դեսպան Սերգեյ Կոպիրկինը միացել է «Հիշեք հաղթանակը» (#ПомнитеПобеду) ֆլեշմոբին` ասմունքելով հայ մեծ գրող Ավետիք Իսահակյանի «Մեծ հաղթանակի օրը» բանաստեղծությունը։ Դեսպանն այն ասմունքում է ռուսերեն` Նիկոլայ Տիխոնովի թարգմանությամբ։
«Ես հաճույքով եմ միացել Երևանում Ռուսաստանի մշակույթի տան կազմակերպած ակցիային։ Պատերազմին նվիրված և այդ տարիներին գրված բանաստեղծությունները ոչ միայն հոգևոր մշակութային կյանքի կարևոր մասն են կազմում, այլ նաև հարգանքի տուրք են»,–ասում է Կոպիրկինը։
Նրա խոսքով` հենց բանաստեղծությունների մեջ է զգացվում կյանքի շունչը, մեզ հաղթանակ նվիրելու` մեր նախնիների հերոսությունը։
Կոպիրկինն ասում է` իր համար զարմանալի չէ, որ ակցիան անցկացվում է հենց Հայաստանում, քանի որ հայերը մեծ ավանդ են ներդրել հաղթանակի համար։
«Հիշեք հաղթանակը». Հայաստանում ՌԴ դեսպան Սերգեյ Կոպիրկինն Իսահակյան է ասմունքում
Հիշեցնենք, որ մայիսի 9-ին Մոսկվայում Հաղթանակի 75-ամյակին նվիրված տոնակատարություն պետք է անցկացվեր, որին մասնակցելու էր նաև ՀՀ վարչապետ Նիկոլ Փաշինյանը։ Սակայն կորոնավիրուսի տարածման կանխարգելման նպատակով միջոցառումը հետաձգվել է։
Ռուսաստանը զգույշ է վերաբերվում Հայաստանի ներսում տեղի ունեցող գործընթացներին. Կոպիրկին