ԵՐԵՎԱՆ, 23 ապրիլի — Sputnik. Նոր կորոնավիրուսային հիվանդության տարածումը կանխելու նպատակով Հայաստանում հայտարարված արտակարգ դրությունը բացահայտել է «Արտակարգ դրության իրավական ռեժիմի մասին» 2012 թվականին ընդունված օրենքի որոշ բացեր:
Կառավարությունն այսօրվա նիստում հաստատեց օրենքում փոփոխություններ կատարելու առաջարկը, որով որոշ հստակեցումներ են առաջարկվում օրենքում նախատեսված հասկացություններում:
«Գործող օրենքով հստակեցման կարիք ունի համաճարակի հետևանքով առաջացած արտակարգ դրության հիմքով հայտարարված արտակարգ դրության դեպքում համաճարակի կանխման նպատակով անձանց անձնական ազատության իրավունքների սահմանափակման հնարավորությունը»,- ասված է կառավարության որոշման հիմնավորման մեջ:
Նախաձեռնության հեղինակները գտնում են, որ անհրաժեշտ է հստակեցնել նաև պարետի և պարետատան կարգավիճակը` պետական կառավարման համակարգի և կառավարչական իրավահարաբերությունների ներկայիս համատեքստում, ինչպես նաև՝ պարետի կողմից ընդունվող ակտերի կարգավիճակը:
Խնդիրն այն է, որ արտակարգ դրության ընթացքում պարետի կողմից ընդունվող ակտերը հրատապ բնույթ են կրում, ուղղված են ծագած խնդիրների օպերատիվ լուծմանը, հետևաբար դրանք ենթակա չեն փորձաքննության:
Պարետի նոր որոշմամբ հանվում է միջմարզային տեղաշարժի սահմանափակումը. էլ ինչ է թույլատրվում
Կառավարության հաստատած նախագիծն առաջիկայում կներկայացվի ԱԺ-ի քննարկմանը:
Հիշեցնենք, որ ապրիլի 13–ի կառավարության արտահերթ նիստում պարետ Տիգրան Ավինյանի առաջարկով ՀՀ–ում արտակարգ դրությւոնը երկարացվեց։ Այն կտևի մինչև մայիսի 14–ը։