ԵՐԵՎԱՆ, 22 ապրիլի – Sputnik․ «Իզվեստիա» թերթը հայտնում է, որ Ռուսաստանի մասնավոր լաբորատորիաները հույս ունեն արդեն մայիսին բոլոր ցանկացողներին առաջարկել կորոնավիրուսի հակամարմինների թեստ հանձնել։
Կորոնավիրուսի հակամարմինների թեստերի ստեղծմամբ մի շարք ռուսական ընկերություններ և լաբորատորիաներ են զբաղվում։ Նրանցից մի քանիսը հայտնել են, որ շուտով կանցնեն «Ռոսկոմնադզորում» գրանցման փուլին։
Մասնավորապես, այս շաբաթվա վերջում գրանցման կներկայացվի Ն․ Ֆ․ Գամալեիի անվան Համաճարակաբանության և միկրոկենսաբանության ազգային հետազոտական ինստիտուտի մշակած թեստ-համակարգը։
Մինչև շաբաթվա վերջ Կազանի դաշնային համալսարանը ևս նախատեսում է ստանալ անալիզի առաջին լաբորատոր օրինակը։ Այնտեղ նաև կորոնավիրուսի հակամարմինների որոշման էքսպրես-համակարգերի վրա են աշխատում, որը արյան մեջ դրանք կհայտնաբերի 10-15 րոպեում։
Մոսկվայի ֆիզիկատեխնիկական ինստիտուտի գենոմային ինժեներիայի լաբորատորիայի ղեկավար Պավել Վոլչկովի խոսքով՝ նման թեստեր ստեղծելը դժվար չէ։ Սակայն պատրաստված հավաքածուի կլինիկական և ախտորոշիչ նշանակությունը հաստատելու համար այն պետք է գրանցի վերահսկողական գերատեսչությունը: Փորձագետները նշել են, որ գրանցումը կարող է տևել մեկ շաբաթից մինչև մեկ ամիս:
Գիտնականները կորոնավիրուսի դեմ նոր դեղամիջոց են հայտնաբերել
Ապրիլի 18-ին հայտնի դարձավ մարդկանց մոտ կորոնավիրուսի հակամարմինների առկայությունը որոշող թեստ-համակարգի մշակման ավարտի մասին։ Ինչպես պատմեց Արյունաբանության ազգային բժշկական հետազոտական կենտրոնի փոխպատվաստման իմունոլոգիայի լաբորատորիայի վարիչ Գրիգորի Եֆիմովը, թեստը ոչ միայն թույլ կտա հայտնաբերել նրանց, ովքեր արդեն հիվանդացել են, այլ նաև ընտրել հակամարմինների մեծ քանակ ունեցող մարդկանց։ Նրանց պլազման կարող է օգտագործվել ծանր հիվանդների բուժման համար։
Ռուսաստանում կորոնավիրուսը բուժող դեղորայք են ստեղծել. սպասում են մասնագետների պատասխանին
Վերջին տվյալներով՝ Ռուսաստանում կորոնավիրուսով 52 763 մարդ է վարակվել։ Ընդհանուր առմամբ 3873 պացիենտ առողջացել է, վարակի զոհ է դարձել 456 մարդ։