ԵՐԵՎԱՆ, 21 ապրիլի – Sputnik. Հայաստանը ՄԱԳԱՏԷ–ից նոր տիպի 2000 թեստ կստանա։ Տեղեկությունն այսօր կառավարությունում հրավիրված մամուլի ասուլիսի ժամանակ ասաց ՀՀ արտաքին գործերի նախարարի տեղակալ Ավետ Ադոնցը։
«Իրականացվում է 6 մլն դոլար բյուջե ունեցող օգնության ծրագիր ՄԱԳԱՏԷ-ի` Ատոմային էներգիայի միջազգային գործակալության կողմից, որի շրջանակներում Հայաստան կբերվեն կորոնավիրուսի նոր տիպի 2000 թեստ` ստեղծված ատոմային մեթոդների հիման վրա, որոնք մի քանի ժամվա ընթացքում տալիս են թեստավորման արդյունքները»,- ասաց փոխնախարարը։
Նա նաև հայտնեց, որ ԱՄՆ–ի կողմից արդեն իսկ հնչեցրած 1,1 մլն դոլար գումարին կավելացնեն ևս 600 հազար։ Այս աջակցությունը կտրամադրվի UNICEF–ի միջոցով։
Ադոնցը նշեց Հայաստանի նաև մյուս գործընկերներին` ՄԱԿ–ի զարգացման ծրագիր, ՄԱԿ–ի բնակչության հիմնադրամ, Կարմիր Խաչ, ԵՄ։
«ԵՄ–ն Հայաստանի տրամադրելու է 3.5 մլն եվրո օգնություն (ԱՀԿ–ի միջոցով 90 մլն օգնության ընդհանուր ծրագրից)», – ասաց Ադոնցը։
Նա առանձին շնորհակալություն հայտնեց հնդիկ գործընկերներին, որոնք պատրաստակամություն են հայտնել դեղորայքով աջակցելու։
«Առանձին կցանկանայի նաև բարձր գնահատել Ռուսաստանի, Իրանի և Վրաստանի հետ մեր համագործակցության արդյունավետությունն ու բարձր մակարդակը։ Սա հնարավորություն է տալիս հետևողականորեն իրականացնել համատեղ աշխատանքը», – ասաց Ադոնցը։
Ավելի վաղ ԵՄ հայաստանյան գրասենյակը հայտնել էր, որ ԵՄ–ն Հայաստանին կորոնավիրուսի դեմ պայքարի համար 51 մլն եվրո կհատկացնի։
Արյան դոնորները կորոնավիրուսի թեստ հանձնո՞ւմ են․ առողջապահության նախարարության պատասխանը
Բացի այդ, Չինաստանի դեսպան Թիեն Էրլուն հայտնել է Հայաստանին անհատույց 110 հազար դոլարի չափով հատուկ բժշկական հագուստ և թոքերի արհեստական շնչառական սարքեր տրամադրելու Պեկինի պատրաստակամության մասին։
Հիշեցնենք, որ ապրիլի 21–ի դրությամբ Հայաստանում գրանցվել է կորոնավիրուսով վարակման 1401 դեպք։ Ապրիլի 13–ի կառավարության արտահերթ նիստում երկրում արտակարգ դրության ռեժիմը երկարացվել է մինչև մայիսի 14–ը։