ԵՐԵՎԱՆ, 21 ապրիլի–Sputnik. Ռուսաստանի նախկին վարչապետ, Անվտանգության խորհրդի փոխնախագահ Դմիտրի Մեդվեդևը մեկնաբանել է նավթի գների շուրջ ստեղծված իրավիճակը։
Facebook–ի իր էջում Մեդվեդևը նշել է, որ նավթի ֆյուչերսային պայմանագրերի շուրջ տեղի ունեցածը (նույնիսկ հաշվի առնելով շուկաներում ապրանքակուտակումները) կարտելային դավադրություն է հիշեցնում։
Հիշեցնենք, որ ավելի վաղ` ապրիլի 21-ին, պատմության մեջ առաջին անգամ WTI տեսակի հյուսիսամերիկյան նավթի գները բացասական են դարձել։ Մայիսյան ֆյուչերսները վաճառվում էին մեկ բարելի դիմաց -40 դոլարով։ Այժմ արդեն գները դուրս են եկել բացասական ցուցանիշից։ Երևանի ժամանակով ժամը 09:17 դրությամբ, WTI տեսակի նավթի մայիսյան ֆյուչերսների գինն ավելացավ 104,38%–ով` հասնելով մեկ բարելի դիմաց մինչև 1,65 դոլարի։
Մեդվեդևի կարծիքով` իրավիճակը պետք է լրջորեն վերլուծվի, քանի որ խաթարում է համաշխարհային տնտեսության
վերականգնումը։ Անվտանգության խորհրդի փոխնախագահը չի բացառում, որ ապագայում նավթի առուծախի սկզբունքները կարող են փոխվել, օրինակ, հաշվի առնելով երկարաժամկետ էներգետիկ պայմանագրերի կնքման փորձը, որոնց դեպքում օգտագործվում է «վերցրու կամ վճարի» («take or pay») սկզբունքը։
Նավթը՝ ջրի գնով. արդունաբերողները վճարում են, որ իրենց ապրանքը տանող լինի
Հիշեցնենք, որ Միջազգային էներգետիկ գործակալության գնահատականների համաձայն, աշխարհում 2020 թվականին նավթի պահանջարկը կնվազի կորոնավիրուսի տարածման պատճառով օրական ռեկորդային 9,3 մլն բարելով։ Ապրիլին պահանջարկը կկրճատվի օրական 29 մլն բարելով` հասնելով 1995 թվականից ի վեր ամենացածր մակարդակին։