ԵՐԵՎԱՆ, 17 ապրիլի – Sputnik. ՀՀ ԱԺ նախագահ Արարատ Միրզոյանն այսօր խորհրդարանում, պատասխանելով լրագրողների հարցերին, չհերքեց՝, որ պատգամավորների մարտ ամսվա պարգևավճարը կորոնավիրուսի դեմ պայքարի ֆոնդին փոխանցելու իր որոշումը որոշ պատգամավորների մոտ դժգոհություն է առաջացրել:
«Մեկ- երկու դեպք կար, երբ մարդիկ արդեն իրենց միջոցներից փոխանցումներ էին արել, մինչև այդ որոշումը, մի քանի մարզերից ընտրված պատգամավորներ այնտեղ ինչ-որ գործունեություն են ծավալում և այլն: Մի քիչ դժվար էր, բայց ես այդ որոշումը կայացրի»,- ասաց Միրզոյանը:
Նա նաև նշեց, որ որոշումը վերաբերել է բացառապես պատգամավորների պարգևավճարներին, ԱԺ–ի շուրջ 600-հոգանոց աշխատակազմի պարգևավճարները վճարվել են աշխատողներին, ինչպես մնացած ամիսներին:
Անդրադառնալով պետական կառավարման համակարգում պարգևավճարների ու հավելավճարների նկատմամբ հանրության ոչ միանշանակ վերաբերմունքին՝ ԱԺ նախագահն ասաց, որ վճարման չափով է նաև պայմանավորված պետական համակարգի աշխատանքի որակը:
«Մեր կազմի պատգամավորներն այն մարդիկ են, որոնք չունեն այլ բիզնեսներ, օր ու գիշեր աշխատում են այստեղ, անում են ջանքեր, որպեսզի լավացնեն մարդկանց կյանքը այս ոլորտում, այն ոլորտում, ու դրա համար վճարվում են: Կա բյուջեով նախատեսված աշխատավարձ ու դրա 30%-ի չափով սահմանված պարգևավճար: Դա միայն այս տարի չէ, այդպես եկել է շարունակաբար, բոլոր-բոլորի համար պետական համակարգում, կապ չունի` կրտսեր մասնագետ է, թե պատգամավոր, այս 30%-ը սահմանված է»,- ասաց Միրզոյանը:
Քաղաքապետարանը 30 միլիոն դրամի հասնող պարգևավճարներ է բաժանել. ովքե՞ր են երջանիկները
ԱԺ նախագահը նշեց, որ տարբեր գերատեսչություններում այդ 30%-ի բաշխումը թողնված է գերատեսչության ղեկավարների հայեցողությանը, ու եղել են դեպքեր, երբ ոմանք շատ են ստացել, ոմանք ընդհանրապես չեն ստացել:
«ԱԺ-ում իմ նախագահ դառնալուց հետո փորձ արեցինք աշխատակազմում խրախուսումներն անել ըստ կատարողականների: Բայց տեսանք, որ որոշ դժվարություններ կան, և հնարավոր է՝ անարդարություն լինի: Եվ հիմա մենք բոլորին հավասար 30% պարգևավճար կոչված հավելյալ աշխատավարձը տալիս ենք» ,- ասաց նա:
Միրզոյանը չբացառեց, որ առաջիկայում պարգևավճարների 30%-ը օրենքով կֆիքսվի աշխատավարձերի չափերի մեջ, և այլևս նման խնդիրներ չեն ծագի:
«Այսօր գրված է 450+150: Կփոխվի, կգրվի՝ 600 հազար աշխատավարձ: Արդյո՞ք դրանից հանրության դժգոհությունը կնվազի, թե կավելանա, չգիտեմ»,- ասաց Միրզոյանը:
Հիշեցնենք, որ պարգևավճարների թեման հաճախ է քննարկման առարկա դառնում։ Ավելի վաղ ՀՀ վարչապետ Նիկոլ Փաշինյանը հայտարարել էր` պետական բարձրաստիճան պաշտոնյաներն իր որոշմամբ մարտի համար պարգևավճար չեն ստանա։ Այդ գումարները կուղղվեն կորոնավիրուսի կանխարգելման աշխատանքներին։
Գյումրիում պարգևավճարներ կստանան քաղաքի մաքրությամբ զբաղվողները