ԵՐԵՎԱՆ, 16 ապրիլի – Sputnik. ՀՀ քննչական կոմիտեից հայտնում են, որ Ա.Բակունցի փողոցում հրազենային վնասվածքից մահացած Երևան քաղաքի 38-ամյա բնակչի սպանության դեպքի առիթով հարուցվել է քրեական գործ։
Նշվում է, որ 2020 թվականի ապրիլի 15-ին` ժամը 20:30-ին, «1-ին համալսարանական հիվանդանոցից» ահազանգ է ստացվել, որ Երևան քաղաքի Ա.Բակունցի փողոցից հրազենային վնասվածքով, մահացած վիճակում, իրենց մոտ է տեղափոխել Երևան քաղաքի 38-ամյա բնակիչ:
Դեպքի առթիվ ՀՀ քննչական կոմիտեի Երևան քաղաքի քննչական վարչության Ավան և Նոր Նորք վարչական շրջանների քննչական բաժնում ՀՀ քրեական օրենսգրքի 104-րդ հոդվածի 1-ին մասով
(սպանություն` ապօրինաբար մեկ ուրիշին դիտավորությամբ կյանքից զրկելը) և 235-րդ հոդվածի 1-ին մասով (ապօրինի կերպով հրազեն և դրա փամփուշտներից ձեռք բերելը, իրացնելը, պահելը, փոխադրելը կամ կրելը) հարուցվել է քրեական գործ:
Ողբերգական վթար Երևանում․ «Opel»-ի 27-ամյա վարորդը վիրահատությունից հետո մահացել է
Նախաքննության ընթացքում կատարվել են անհետաձգելի քննչական և այլ դատավարական գործողություններ, այդ թվում՝ դիակի զննություն, դեպքի վայրի զննություն, որի ժամանակ ճամփեզրին կայանված «Lexus» մակնիշի ավտոմեքենայի առջևի ձախ կողմի ապակու վրա հայտնաբերվել են վնասվածքներ, առջևի ձախ կողմի դռան ապակին եզրավորող ստորին հորիզոնական հարթակի վրա՝ ներսեղմված վնասվածք, դեղնավուն մետաղաբեկորներ, ավտոմեքենայի կողքին՝ ճանապարհի վրա, հայտնաբերվել են արնանման հետքեր և 3 հատ կրակված պարկուճ:
Նշանակվել են մի շարք փորձաքննություններ, այդ թվում՝ դիակի դատաբժշկական, դատաձգաբանական, դատահետքաբանական, դատաքիմիական, դատաապրանքագիտական համալիր փորձաքննություն: Նախաքննությունը շարունակվում է: