ԵՐԵՎԱՆ, 15 ապրիլի — Sputnik. Արցախի նախկին վարչապետ (պետնախարար) «Ազատ Հայրենիք» կուսակցության ղեկավար Արայիկ Հարությունյանը զգալի առավելությամբ հաղթեց Արցախի Հանրապետության նախագահի ընտրությունների երկրորդ փուլում, որն անցկացվեց երեկ` ապրիլի 14-ին։
ԿԸՀ-ի նախնական տվյալների համաձայն ՝ ընտրություններին մասնակցել է 47 165 մարդ կամ ընտրողների ընդհանուր թվի 44,9 տոկոսը: Անվավեր է ճանաչվել 1876 քվեաթերթիկ։
Մարտի 31–ին կայացած ընտրությունների առաջին փուլից հետո մրցապայքարում էին մնացել Հարությունյանն ու արտգործնախարար Մասիս Մայիլյանը։
Բոլոր 282 ընտրատեղամասերի քվեաթերթիկների մշակման արդյունքում Հարությունյանի օգտին քվեարկել է 39 860 մարդ, Մայիլյանի օգտին ՝ 5 428:
Հիշեցնենք, որ նախագահական ընտրությունների առաջին փուլի արդյունքում Արայիկ Հարությունյանին օգտին քվեարկել էր ընտրողների 49,26%-ը, արտգործնախարար Մասիս Մայիլյանի օգտին՝ 26,4%-ը։
Նշենք, որ ՀՀ նախագահ Արմեն Սարգսյանը երեկ արդեն շնորհավորել է Արայիկ Հարությունյանին Արցախում նախագահի ընտրությունների երկրորդ փուլում հաջողության հասնելու և Արցախի Հանրապետության նախագահի բարձր պաշտոնում ընտրվելու առթիվ։
Արայիկ Հարությունյանը պաշտոնը կստանձնի մայիսի 22-ին: