ԵՐԵՎԱՆ, 15 ապրիլի – Sputnik. ԵԱՏՄ անդամ բոլոր երկրներն այժմ այն ապրանքատեսակների ցանկն են մշակում, որոնք ԵԱՏՄ տարածք կներմուծվեն կա՛մ առանց մաքսատուրքի, կա՛մ էլ շատ չնչին մաքսատուրքով։ Կառավարության մամուլի կենտրոնում կայացած ասուլիսի ժամանակ տեղեկությունը հայտնեց ՀՀ էկոնոմիկայի նախարարի տեղակալ Վարոս Սիմոնյանը։
«ԵԱՏՄ բոլոր անդամ երկրների կողմից նախաձեռնություն կա, ըստ որի` առաջարկ կներկայացվի, որ որոշ ապրանքների մասով, որոնք սոցիալական նշանակություն ունեն, ներմուծումը կզրոյացվի կամ մաքսատուրքերն էականորեն կնվազեն։ Քննարկումներն այժմ շարունակվում են»,–ասաց փոխնախարարը։
Սիմոնյանի խոսքով` ՀՀ էկոնոմիկայի նախարարությունը տնտեսվարողների հետ քննարկում է, թե ինչ ապրանքատեսակներ կամ հումքի ինչ տեսակներ կարող են ներկրվել, որոնք այս պահին անհրաժեշտ են։
Նա հիշեցրեց, որ Եվրասիական տնտեսական հանձնաժողովի նիստի N 33 որոշմամբ հաստատվել էր կրիտիկական ներմուծման ապրանքների ցանկը, որոնք ապրիլի 1-ից հունիսի 30-ը ներառյալ երրորդ երկրներից ԵԱՏՄ երկրներ ներմուծելիս կազատվեն մաքսատուրքերից։
Այդ ցանկում ներառվել են գյուղատնտեսական և պարենային ապրանքներ, մասնավորապես՝ կարտոֆիլ, սոխ, սխտոր, կաղամբ, գազար, պղպեղ, բրինձ, հնդկաձավար, հյութեր, մանկական սննդի համար պատրաստի մթերք։ Ցանկում են ընդգրկվել նաև որոշ դեղամիջոցներ և բժշկական նշանակության պարագաներ: Որոշումն արդեն ուժի մեջ է մտել։
«Պայթյուն» հետո կլինի․ ինչպես է կորոնավիրուսը ազդում Հայաստանի տնտեսության վրա
Սիմոնյանը հայտնեց` ԵՄ–ն «Կանաչ գյուղատնտեսություն» նախաձեռնության նիստի ժամանակ որոշում է կայացրել, որ 456 500 եվրո կհատկացնի Հայաստանի գյուղատնտեսությանը։
Հիշեցնենք, որ ուժի մեջ է մտել նաև ԵԱՏՄ 34 N որոշումը, որով ընդլայնվել է մարտի 16-ի որոշմամբ հաստատված, մինչև սեպտեմբերի 30-ը երրորդ երկրներից ԵԱՏՄ տարածք ներմուծվող անհատական պաշտպանության և ախտահանման միջոցներ, առանձին բժշկական սարքավորումներ և նյութեր ներառող ապրանքների ցանկը։
Ովքեր ու ինչպես են «խաղում» գների հետ. ՏՄՊՊՀ նախագահը խոստանում է խիստ պատժել