ԵՐԵՎԱՆ, 15 ապրիլի – Sputnik. Արցախի Հանրապետության արտաքին գործերի նախարար, նախագահի նախկին թեկնածու Մասիս Մայիլյանը հերքել է լրատվամիջոցներից մեկում հրապարակված տեղեկությունը, թե ինքը ընտրություններից հետո շտապել է Երևան հետագա անելիքները հստակեցնելու համար։
«Երևանյան լրատվամիջոցներից մեկը մի ապատեղեկատվություն է տարածել, ըստ որի անցած գիշեր ես իբր մի քանի օրով մեկնել եմ Հայաստանի մայրաքաղաք՝ իմ հետագա գործունեության հետ կապված հարցեր ճշտելու»,- Facebook-ի իր էջում գրել է նա։
Մայիլյանն այդ ամենը իր դեմ ուղղված տեղեկատվական պատերազմ է որակել և նշել, որ անգամ ընտրություններից հետո չեն դադարում իր դեմ ապատեղեկատվություն տարածել։ Մայիլյանը վստահեցրել է, որ չի պատրաստվում Ստեփանակերտից որևէ տեղ մեկնել։
«Իրականում ես գտնվում եմ Ստեփանակերտում և մտադիր չեմ որևէ տեղ մեկնել։ Ճիշտ այնպես, ինչպես չեմ հեռացել 2007-ին, երբ քաղաքական հետապնդումներ էին իրականացվում իմ ու կողմնակիցներիս նկատմամբ»,- ասել է նա։
Փորձել են քվեաթերթիկը լուսանկարել. Արցախում ընտրություններից հետո քրգործեր են հարուցվել
Երեկ՝ ապրիլի 14-ին, Արցախում անցկացվեց նախագահի ընտրությունների երկրորդ փուլը, որի արդյունքում հաղթեց Արայիկ Հարությունյանը։ ԿԸՀ-ի նախնական տվյալների համաձայն՝ ընտրություններին մասնակցել է 47 165 մարդ կամ ընտրողների ընդհանուր թվի 44,9 տոկոսը: Անվավեր է ճանաչվել 1876 քվեաթերթիկ։
Թեև քվեաթերթիկում նշված էր թեկնածու Մասիս Մայիլյանի անունը, այնուամենայնիվ, նա երեկ քվեարկությանը չի մասնակցել, ավելի վաղ կոչ էր արել իր համակիրներին չմասնակցել ընտրություններին` խուսափելով կորոնավիրուսի տարածումից:
Հիշեցնենք, որ մարտի 31–ին կայացած ընտրությունների առաջին փուլից հետո մրցապայքարում էին մնացել Հարությունյանն ու արտգործնախարար Մասիս Մայիլյանը։
Ընտրությունների առաջին փուլի արդյունքում նախկին վարչապետ (պետնախարար) «Ազատ Հայրենիք» կուսակցության ղեկավար Արայիկ Հարությունյանը ստացել է ձայների 49,26%-ը, արտգործնախարար Մասիս Մայիլյանը՝ 26,4%-ը։