ԵՐԵՎԱՆ, 14 ապրիլի – Sputnik․ Կորոնավիրուսային իրավիճակը Հայաստանում ընդհանուր առմամբ վերահսկողության տակ է: Նման հայտարարություն է արել ՀՀ վարչապետ Նիկոլ Փաշինյանն այսօր ԵԱՏՄ անդամ երկրների ղեկավարների հետ տեսախորհրդակցության ընթացքում։
Ինչպես նշել է կառավարության ղեկավարը, ապրիլի 14-ի դրությամբ Հայաստանում վարակման 1067 դեպք է գրանցված, 16 պացիենտ մահացել է։
Մարտի 16-ից սկսած Հայաստանում արտակարգ դրության ռեժիմ է գործում, իսկ մարտի 23-ից՝ խիստ կարանտին։ Ապրիլի 14-ից սկսած որոշակի թույլտվություններ են տրված, ընդլայնվել է ուղղվածությունների ցանկը, որոնց տնտեսական գործունեությունը թույլատրված է։
«Ինչպես և գործնականում բոլոր երկրները, որտեղ հասել է համավարակը, մենք խիստ սահմանափակումներ ենք մտցրել արտաքին տրանսպորտային հաղորդակցության ոլորտում։ Կառավարությունը 11 միջոցառումներից բաղկացած փաթեթ է ընդունել՝ համավարակի տնտեսական հետևանքները ինչպես բնակչության, այնպես էլ բիզնեսի համար մեղմելու նպատակով»,-ասել է Փաշինյանը։
Դրան զուգահեռ, Հայաստանում լուրջ միջոցներ են ձեռնարկվում տնտեսության խթանման և ծանր ճգնաժամային երևույթների (որոնց անխուսափելությունն արդեն անկասկած է) հաղթահարման ուղղությամբ։
Բանկային վարկերի այլընտրանք. Հայաստանում քննարկվում է լիզինգի կիրառման հարցը
Ինչպես նշել է Փաշինյանը, այսօր երկրները բախվել են մարտահրավերների, որոնք սպառնում են ոչ միայն առողջապահական համակարգին և քաղաքացիների առողջությանը, այլև իրենց բնույթով աննախադեպ խնդիրներ են ստեղծում տնտեսությունների համար։
Շատ փորձագետներ, նրա խոսքով, արդեն համաշխարհային տնտեսության անկում են կանխագուշակում, որն իր մասշտաբներով համեմատելի կլինի թերևս միայն «մեծ դեպրեսիայի» հետ։
Իրավիճակն ավելի է բարդանում նրանից, որ հայտնի չէ, թե որքան երկար կձգվի համավարակը։ Խնդիրների հաղթահարումը կառավարության ուժերի առավելագույն լարում է պահանջում։
«Ակնհայտ է նաև, որ պահանջվում է միջազգային հանրության ջանքերի համակարգում և ձեռնարկվող միջոցառումների համախմբում։ Սակայն, ինչպես այսօր տեսնում ենք, իրավիճակից ելքն ու միջազգային ճգնաժամի հաղթահարումը շատ երկրներ տեսնում են հովանավորչական տրամաբանության և միջազգային առևտրում սահմանափակող միջոցների կիրառման քայլերում»,-ասել է վարչապետը։
Նա նշել է, որ մոտ 70 երկիր արդեն բժշկական միջոցների և դեղամիջոցների արտահանման արգելք է մտցրել։ Չի բացառվում, որ տենդենցը կընդլայնվի՝ ներառելով ավելի շատ ապրանքներ։ Դա չի կարող չանհանգստացնել Հայաստանին։
Բողոքի ակցիա Երևանում. երթուղայինների վարորդները չգիտեն՝ ինչպես տունը պահեն
«Սահմանափակ տնտեսական հնարավորություններով և ռեսուրսներով երկրների համար դա կարող է շատ ծանր հետևանքներ ունենալ։ Մենք աջակցում ենք այլ ռազմավարության՝ համագործակցության և փոխաջակցության փիլիսոփայության վրա հիմնված ռազմավարությանը։ Այս առումով մեզ համար առաջնային է համագործակցությունը մեր միության շրջանակներում»,-ասել է Փաշինյանը։
Նա նշել է, որ Երևանի տեսլականը լիակատար ըմբռնում և աջակցություն է գտել ԵԱՏՄ գործընկերների և բարեկամների շրջանակում։
Փաշինյանը վստահություն է հայտնել, որ միությունը ոչ միայն կդիմանա այս փորձությանը, այլև իր կառույցների շնորհիվ կկարողանա ճգնաժամից նվազագույն կորուստներով դուրս գալ։
«Հայաստանը պատրաստ է դրա համար առավելագույն ջանք ներդնել»,-վստահեցրել է Փաշինյանը։
Երևանն աջակցում է Բարձրագույն Եվրասիական տնտեսական խորհրդի հայտարարությանը, քանի որ այն արտահայտում է տիրող իրավիճակի շուրջ ընդհանրական դիրքորոշումը։
Ինտեգրացիոն միավորման համակարգաստեղծ սկզբունքը ազատ առևտուրն է, և որոշումներ ընդունելիս երկրները պետք է հաշվի առնեն այդ սկզբունքի պահպանման անհրաժեշտությունը։ Հենց այդ պատճառով Հայաստանն անթույլատրելի է համարում այնպիսի միջոցների կիրառումը, որոնք խոչընդոտում են ԵԱՏՄ-ի ներսում ապրանքների կամ ծառայությունների տեղափոխությանը։ Հայաստանի համար ծայրաստիճան կարևոր է բեռնափոխադրումների անխափան իրականացումը։
«Այս առումով հայ-վրացական սահմանը մեզ համար կենսական, ռազմավարական կարևորության նշանակություն է ստացել»,-նշել է Փաշինյանը։
Հաշվի առնելով անորոշությունը համաշխարհային ֆինանսական համակարգում, Երևանն անհրաժեշտ է համարում միջոցներ ձեռնարկել ԵԱՏՄ շրջանակներում ազգային արժույթներով վճարումների մասնաբաժինն ավելացնելու համար։ ՀՀ վարչապետն ընդգծել է Միությունում ընդունվող հակաճգնաժամային որոշումների, մասնավորապես՝ «կանաչ միջանցքների» ստեղծման կարևորությունը։
Կոմունալ վճարների փոխհատուցման հարցն էլի է քննարկվում. 12-րդ ծրագիրն են մշակում
«Ակնհայտ է, որ մաքսային ընթացակարգերի պարզեցումը սկզբունքային նշանակություն ունի մեր երկրի արտաքին տնտեսական կապերի պահպանման համար»,-ասել է Փաշինյանը։
Ստեղծված պայմաններում նա ընդգծել է քայլերի առաջնահերթությունը Միության թվային օրակարգի շրջանակներում։ ՀՀ վարչապետը նաև նշել է Եվրասիական զարգացման բանկի կողմից միության երկրներին վարկային աջակցության տրամադրման նպատակահարմարությունը:
Ընդհանուր առմամբ, ըստ Փաշինյանի, այս օրերին երկրների փոխադարձ աջակցությունը ցույց տվեց, որ ինտեգրումը կայացել է և զարգացման մեծ ներուժ ունի: Նա վստահություն է հայտնել, որ երկրները կձգտեն ամրապնդել այն ՝ չնայած անբարենպաստ պայմաններին։
ԵԱՏՄ-ն միջազգային ինտեգրացիոն տնտեսական միավորում է, որն ստեղծվել է Մաքսային միության և Միասնական տնտեսական տարածքի հիման վրա և գործում է 2015 թվականի հունվարի 1-ից: Այժմ ԵԱՏՄ-ին անդամակցում են Ռուսաստանը, Հայաստանը, Բելառուսը, Ղազախստանը և Ղրղզստանը։
Կորոնավիրուսով վարակվածների թիվը դեռ ավելանում է. Հայաստանում արդեն 1067 դեպք է հաստատվել