ԵՐԵՎԱՆ, 13 ապրիլի – Sputnik. Արցախում կորոնավիրուսի վարակով երեկ հաստատված քաղաքացին Շահումյանի շրջանի Քարվաճառի բուժմիավորումից այսօր տեղափոխվում է Շուշիի բուժմիավորում: Տեղեկությունը հաղորդում է Արցախի Հանրապետության առողջապահության նախարարությունը։
Համաձայն հայտարարության` նրա ընտանիքի 5 անդամները, ովքեր մինչ այս պահը ինքնամեկուսացած էին, տեղափոխվելու են մեկուսացման համար առանձնացված հաստատություն. նրանց առողջական վիճակը գնահատվում է բավարար, հիվանդությանը բնորոշ ախտանիշներ չկան:
Այս պահի դրությամբ Արցախում նոր թեստավորումներ չեն իրականացվել:
Հիշեցնենք, որ ապրիլի 12–ին հայտնի դարձավ, որ Արցախում կորոնավիրուսով վարակվածների թիվն ավելացել է մեկով և դարձել 6։
Ապրիլի 7-ին հայտնի դարձավ, որ Արցախում կորոնավիրուսի դեպք է հաստատվել. վարակվածը Միրիկ գյուղի բնակիչ, 60 տարեկանից բարձր տարիքի տղամարդ է, որն ապրիլի 2-ին առավոտյան շտապօգնության մեքենայով տեղափոխվել էր Քաշաթաղի բուժմիավորումում և մեկուսացվել, այնուհետև տեղափոխվել Երևան:
Արցախի Հանրապետության նախագահ Բակո Սահակյանի հրամանագրով Արցախում արտակարգ իրավիճակ է հայտարարվել։ Այն կտևի մինչև մայիսի 12-ը։