ՀՀ երկրորդ նախագահ Ռոբերտ Քոչարյանի փաստաբան Հովհաննես Խուդոյանը Երևան քաղաքի ընդհանուր իրավասության դատարանի աշխատակազմի ղեկավար Արմեն Ասլանյանին ուղղված դիմումում խնդրել էր իրեն տրամադրել տեղեկություն դատավոր Աննա Դանիբեկյանի առողջական վիճակի, անհրաժեշտ փաստաթղթային հիմքերի և աշխատանքի վերադառնալու ժամկետի մասին։
Թեև Խուդոյանը Ասլանյանից դեռ պատասխան չի ստացել, սակայն նշենք, որ Բարձրագույն դատական խորհրդի կայքում տեղադրված է հաղորդագրություն, ըստ որի`Երևան քաղաքի առաջին ատյանի ընդհանուր իրավասության դատարանը տեղեկացված է, որ դատավոր Աննա Դանիբեկյանին տրամադրված ժամանակավոր անաշխատունակության թերթիկի ժամկետը սույն թվականի ապրիլի 16-ն է, և եթե բուժող բժիշկն այն չերկարաձգի, դատավորն ապրիլի 17-ին կներկայանա աշխատանքի։
Խուդոյանի դիտարկմամբ` խոսքն այն մասին չէ, որ տիկին Դանիբեկյանն առողջական խնդիր չունի, պարզապես ՀՀ երկրորդ նախագահի պաշտպանական խումբը դեռ վերջնական տեղեկություն չունի։ Ըստ նրա` եթե իրականում կա խնդիր, ապա պարզ չէ, թե դա ինչ խնդիր է։
Ռոբերտ Քոչարյանի պաշտպանը երկրորդ անգամ է դիմել ՄԻՊ-ին
«Եթե դատավորն ունի առողջական խնդիր ու տևական ժամանակ չի կարողանում մասնակցել դատական նիստերին, ապա առնվազն խափանման միջոցի վերաբերյալ միջնորդությունը պետք է վերամակագրվի դատարանի այլ դատավորի, ով կքննի այդ միջնորդությունը, կապահովի անձի դատական պաշտպանության իրավունքը, այդ թվում՝ կքննի ազատության իրավունքի հարցը»,– Sputnik Արմենիայի հետ զրույցում ասաց փաստաբանը։
ՀՀ երկրորդ նախագահի պաշտպանը շեշտեց, որ անկախ այն հանգամանքից` իրավաչափ է տիկին Դանիբեկյանի բացակայությունը, թե ոչ, միևնույն է ձգձգումներն արհեստական են և ունեն որոշակի միտում։
«Եթե իմ դիմումը դիտարկվում է սովորական տեղեկություն ստանալու ընթացակարգով, ապա այն պետք է տրամադրվի հնգօրյա կամ մեկամսյա ժամկետում է, եթե ընդհանուր կանոնները նայենք, բայց փորձը ցույց է տալիս, որ պարոն Ասլանյանը երկու–երեք օրվա ընթացքում պատասխանել է նախորդ հարցադրումներին։ Այս անգամ նույնպես ակնկալում ենք նույնական ժամկետ»,– ընդգծեց փաստաբանը։
Կախված պատասխանի բնույթից և այն հանգամանքից , թե ինչ պատասխաններ կհետևեն հարցադրումներին, Խուդոյանի փոխանցմամբ` Ռոբերտ Քոչարյանի պաշտպանական խումբը կձեռնարկի իրավական գործընթաց, որովհետև իրենք կարծում են, որ այս պահին առկա են առերևույթ հանցագործության հատկանիշներ գործընթացի ձգձգման հիմքով։
https://armeniasputnik.am/armenia/20200407/22648082/robert-qocharyany-dati-e-tvel-nikol-pashinyanin.htmlԸստ պաշտպանի` իրենց հարցադրման նպատակն է հասկանալ՝ այդպիսի արարքի հատկանիշներ հայտնաբերելու դեպքում որն է լինելու այն անձանց շրջանակը, որոնք պատասխանատու են դրա համար։