ԵՐԵՎԱՆ, 13 ապրիլի – Sputnik. Բնապահպանության և ընդերքի տեսչական մարմինը հայտարարություն է տարածել օրեր առաջ ՀՀ Կոտայքի մարզի Սևաբերդ համայնքում գտնվող ջրամբարում ձկների զանգվածային անկման հանգամանքների վերաբերյալ։
«Լաբորատոր հետազոտությունների բաժնի իրականացրած անալիտիկ հետազոտությունների արդյունքները փաստել են, որ ջրում լուծված թթվածնի քանակությունը չափաքանակից պակաս է եղել, իսկ ամոնիումի, ամոնյակի, նիտրիտ և սուլֆիդ իոնների քանակությունները գերազանցել են սահմանային թույլատրելի չափաքանակները»,-հայտնում է տեսչական մարմինը։
Բացի այդ, «Հանրապետական անասնաբուժասանիտարական և բուսասանիտարական լաբորատոր ծառայությունների կենտրոն» ՊՈԱԿ-ից հայտնել են, որ լաբարատոր հետազոտությունների ուղարկված անկած ձկների խմբաքանակը եղել է նեխած, ուստի այն ենթակա (պիտանի) չի եղել մանրէաբանական հետազոտության։
«Ջրային կոմիտեից տեղեկացանք, որ ջրամբարի թասը պատված է եղել պոլիէթիլենային թաղանթով, որը շարքից դուրս է եկել և չի ապահովում անհրաժեշտ ջրամեկուսացում»,-նշված է հաղորդագրության մեջ։
Ինչո՞ւ են Սևաբերդում ձկները սատկել․ պարզաբանում է մարզպետը
Պարզվում է, ջրամբարում 2019 թվականին ջուր չի կուտակվել, ջրահավաք ավազանի ձնհալքից մուտք գործած ջուրը եղել է աննշան: Ձմեռացման շրջան ջրամբարի թասը մուտք է գործել գրեթե դատարկ վիճակում, թասում ջուր է մնացել ջրթող աշտարակին հարող փոսորակում և դրա հարակից ծանծաղուտներում, հենց այդ հանգամանքն էլ բերել է նրան, որ բարձր տեղադիրքի պայմաններում ձմռանը ջրի մակերեսը սառցապատվել է և թթվածնի պակասի պայմաններում տեղի է ունեցել ձկների անկումը (առաջացել է թթվածնային քաղց):
Սառցապատ շերտը հալվելուց հետո արդեն իսկ նեխած, անկած ձկները դուրս են եկել ջրի ափամերձ հատված՝ առաջացնելով գարշահոտություն։
Ինչ վերաբերում է ջրում առկա իոնների սահմանված չափաքանակից բարձր ցուցանիշին, այն կարող էր առաջանալ անկած ձկների նեխման և քայքայման արդյունքում։
Հիշեցնենք, մարտի 27-ին «Ֆեյսբուք»-յան օգտատեր Տիգրան Առաքելյանը տեսանյութ էր հրապարակել, որի համաձայն՝ Սևաբերդի ջրամբարում ձկների զանգվածային անկում էր տեղի ունեցել:
Ի պատասխան քաղաքացու ահազանգի՝ Բնապահպանության և ընդերքի տեսչական մարմնից հայտնել էին, որ տեսանյութի վերաբերյալ տեղեկացվել են տեսչության Կոտայքի տարածքային բաժնի աշխատակիցները: Նրանք ուսումնասիրություն էին իրականացրել և կատարել ջրի նմուշառում։