ԵՐԵՎԱՆ, 13 ապրիլի-Sputnik. ՌԴ-ում ՀՀ դեսպան Վարդան Տողանյանը տեսակապի միջոցով խոսել է «Դոմոդեդովո» օդանավակայանում գտնվող այն ՀՀ քաղաքացիների հետ, որոնք նախորդ օրվա չարտերային թռիչքով չեն կարողացել մեկնել Հայաստան։ Տեղեկությունը հայտնում է ՌԴ-ում ՀՀ դեսպանությունը։
«Քաղաքացիները դեսպանությանն են փոխանցել հնարավոր չվերթին սպասողների ցուցակը։ Նշենք, որ հետագայում դեպի Հայաստան հնարավոր թռիչքի պարագայում նշյալ քաղաքացիներին կտրվի առաջնահերթություն։ Դեսպանությունն իր կողմից ցուցակը կփոխանցի թռիչքն իրականացնող ավիաընկերությանը»,-նշված է հայտարարության մեջ։
ՌԴ-ում ՀՀ դեսպանությունից հայտնում են նաև,որ առաջիկայում դեպի Երևան թռիչք չի նախատեսվում։
Ապրիլի 12-ին «Դոմոդեդովո» օդանավակայանից Մոսկվա-Երևան երրորդ չարտերային չվերթով հայրենիք վերադարձան 230 քաղաքացի, որոնցից 201-ի մեկնումը կազմակերպվել է անվճար։
Ռուսաստանից Հայաստան վերադարձող քաղաքացիներին դեսպանությունը քաղցրով է ճանապարհում
Ավելի վաղ՝ ապրիլի 6- ին և 7-ին կազմակերպված չարտերային չվերթերով 400-ից ավելի քաղաքացի է տեղափոխվել Հայաստան։ Հայրենիք վերադառնալու համար դեսպանությունում ցուցակագրվածների թիվը, սակայն, գրեթե 2000 էր։
Հիշեցնենք, որ նշված չարտերային չվերթերով Հայաստան վերադարձած բոլոր քաղաքացիներն անմիջապես օդանավակայանից տեղափոխվել են մեկուսացման հատուկ վայրեր՝ 14-օրյա կարանտինային պարտադիր ռեժիմում անցկացնելու համար։