ԵՐԵՎԱՆ, 12 ապրիլի-Sputnik. «Դոմոդեդովո» օդանավակայանից Մոսկվա-Երևան երրորդ չարտերային չվերթն իրականացնող ինքնաթիռն արդեն օդում է։
«Հայրենիք է վերադառնում 230 քաղաքացի, որոնցից 201-ի մեկնումը հնարավոր եղավ կազմակերպել անվճար»,-տեղեկացնում է Ռուսաստանում Հայաստանի դեսպանության Facebook-ի պաշտոնական էջը։
Նույն օդանավով Հայաստան են տեղափոփվում նաև ռուսական կողմից ՀՀ Առողջապահության նախարարությանը փոխանցված կորոնավիրուսի ախտորոշման թեստեր, նաև այլ երկրներից Մոսկվա տարանցման ճանապարհով բերված ռեագետներն ու տարբեր անհրաժեշտ պարագաներ։
Ռուսաստանից Հայաստան վերադարձող քաղաքացիներին դեսպանությունը քաղցրով է ճանապարհում
«Մեր խորին երախտագիտությունն ենք հայտնում «Հայաստան» համահայկական հիմնադրամին («Տաշիր» բարեգործական հիմնադրամի հետ համագործակցությամբ) մոտ 60 քաղաքացու՝ հայրենիք անվճար վերադարձի ապահովման հարցում ցուցաբերած աջակցության համար»,- նշված է դեսպանության հաղորդագրության մեջ։
Դեսպանությունը նաև տեղեկացնում է, որ Հայաստան մեկնել ցանկացող, բայց այս չվերթով մեկնել չկարողացած 8 քաղաքացիներ օդանավակայանից տեղափոխվել են «Նոյ» հյուրանոց, ևս 30-ը՝ Պոդոլսկում գտնվող ժամանակավոր կացարան։
Նշենք, որ սա Մոսկվա-Երևան երրորդ չարտերային չվերթն է, որն իրականացնում է «Ռեդ Վինգս» ավիաընկերությունը։ Ավելի վաղ՝ ապրիլի 6- ին և 7-ին կազմակերպված չարտերային չվերթերով 400-ից ավելի քաղաքացի է տեղափոխվել Հայաստան։ Հայրենիք վերադառնալու համար դեսպանությունում ցուցակագրվածների թիվը, սակայն, գրեթե 2000 էր։
Հիշեցնենք, որ նշված չարտերային չվերթերով հայաստան վերադարձած բոլոր քաղաքացիներն անմիջապես օդանավակայանից տեղափոխվել են մեկուսացման հատուկ վայրեր՝ 14-օրյա կարանտինային պարտադիր ռեժիմում անցկացնելու համար։ Մի քանի ժամից Երևան վայրէջք կատարող օդանավի ուղևորները ևս 14-օրյա պարտադիր մեկուսացման են ենթարկվելու։
Առաջիկայում թռիչքներ չեն լինի. «Դոմոդեդովոյում» մնացած հայերին հորդորում են հյուրանոց գնալ