ԵՐԵՎԱՆ, 12 ապրիլի - Sputnik. Հիսուս Քրիստոսի Սուրբ Հարության տոնի առիթով Ամենայն հայոց կաթողիկոս Ն.Ս.Օ.Տ.Տ. Գարեգին Երկրորդը պատգամ է հղել հավատացյալներին։
«Տիրոջ խաչելության և մահվան հարուցած ցավը փոխակերպվեց Փրկչի հաղթության բերկրանքի, վշտի մռայլ գիշերը՝ հարության տիեզերանորոգ արշալույսի։ Եվ քրիստոնեության լույսն ու վարդապետությունը հաղթականորեն տարածվեցին ողջ աշխարհում՝ մարդկության կյանքն ուղղորդելով դեպի փրկություն ու հավիտենություն»,- ասել է Վեհափառը՝ նշելով, որ Հարության ավետիսը առանձնակի հուսառատությամբ ու մխիթարությամբ է արձագանքում դժվարին այս օրերին, երբ մարդկությունը կորոնավիրուսի համավարակի դեմ է պայքարում։
Ամենայն հայոց կաթողիկոսը հիշեցրել է, որ վարակի տարածումը կանխարգելելու նպատակով աշխարհի տարբեր երկրներում զատկական արարողությունները եկեղեցիներում դռնփակ են անցկացվում՝ առանց հավատացյալների ներկայության։
Պատարագ առանց հավատացյալների. Հայ առաքելական եկեղեցին նշում է Սուրբ Հարության տոնը
«Աշխարհով մեկ տարածված համավարակը մարտահրավեր է՝ ուղղված մարդկությանը, բայց հատկապես՝ մարդկայնությանը։ Հավատում ենք, որ մարդկությունը կհաղթահարի համավարակի այս ծանր կացությունը և դրանով պայմանավորված բոլոր դժվարությունները սոցիալական, տնտեսական, կրթական, հասարակական ոլորտներում»,- ասել է Վեհափառը՝ հույս հայտնելով, որ հնարավոր կլինի աշխարհում հաղթել բոլոր անմարդային դրսևորումները՝ աղքատության, անհավասարության, պատերազմների ու բոլոր չարիքների վերջը տալով։
Գարեգին Երկրորդը վստահություն է հայտնել, որ Աստծո ողորմությամբ աշխարհն իրեն բաժին հասած այս փորձությանն էլ կդիմագրավի։
«Այո՛, սիրելիներ, Հարության հավատքով, մեր կյանքում Փրկչի ներկայության գիտակցությամբ մենք ի զորու կլինենք լուծման առաջնորդելու մեր ժողովրդի առջև հառնած խնդիրները և կերտելու այն լուսավոր ապագան, որ երազում ենք բոլորս։ Քաջ գիտենք, որ դուք աշխարհում ամենուր դիմակայում եք առկա նեղություններին ու դժվարություններին։ Բոլոր հանգամանքներում, սակայն, մեր պատրաստակամությունն ու հանձնառությունը պիտի դրսևորվի՝ հոգ տանելու նաև մեր հայրենիքի և մեր քույրերի ու եղբայրների հանդեպ»,- ասել է վեհափառը։
Ոտնլվայի արարողության ժամանակ Էջմիածնում դուրս կբերվի Սուրբ Գրիգոր Նարեկացու մասունքը
Նա կոչ է արել աշխարհասփյուռ հայերին միավորվել և համատեղ ջանքերն ու կարողություններն ուղղորդել այս պայքարին, նաև նվիրաբերություններ կատարել կորոնավիրուսի համավարակի դեմ պայքարելու համար բացված հատուկ հաշվեհամարին։