ԵՐԵՎԱՆ, 7 ապրիլի –Sputnik. Կառավարության մամուլի կենտրոնում կայացած ասուլիսի ժամանակ ԿԳՄՍ նախարարի տեղակալ Արայիկ Խզմալյանն ասաց, որ նախարարությունն աջակցում է այն արվեստագետներին, որոնք այս օրերին հայտնվել են դժվարին իրավիճակում։
Հայաստանում կորոնավիրուսով վարակվածների թիվը հասավ 853–ի. 20 նոր դեպք է արձանագրվել
«Այժմ ցուցակագրում ենք արվեստագետների, տարեց միայնակ ստեղծագործողների ցանկը, քանի որ կան մարդիկ, որ աջակցության կարիք ունեն։ Խոսքը միայն ֆինանսական աջակցության մասին չէ»,–ասաց փոխնախարարը։
Խզմալյանի խոսքով` Կինեմատոգրաֆիստների միության հետ արդեն իսկ ձևավորվել են կամավորների խմբեր, իսկ Առողջապահության նախարարությունը տրամադրել է համապատասխան բժշկական պարագաներ, որոնք կանխարգելում են վարակի փոխանցումը։ Կամավորներն այցելում են ավագ սերնդի արվեստագետներին` աջակցելով նրանց դեղերի և կենցաղային անհրաժեշտ իրերի ձեռքբերման հարցում։
Փոխնախարարը հայտնեց` աջակցության շրջանակն ընդլայնելու համար այժմ բանակցություններ են վարում հովանավորների հետ։
Խզմալյանը վստահեցրեց նաև, որ մշակութային ոլորտի աշխատակիցներն այս օրերի համար կստանան իրենց աշխատավարձերը։
Ինչ է արվում մարզերում հեռավար կրթությունից դուրս մնացած աշակերտների խնդիրը լուծելու համար