ԵՐԵՎԱՆ, 7 ապրիլի – Sputnik.Արցախում գրանցված կորոնավիրուսի առաջին ու առայժմ միակ դեպքից հետո Արցախի Հանրապետության իշխանությունները որոշել են տվյալ քաղաքացու բնակության վայրը՝ Միրիկ գյուղն ամբողջությամբ ինքնամեկուսացնել: Տեղեկությունը լրագրողների հետ հանդիպմանը հայտնեց ԱՀ պետնախարար Գրիգորի Մարտիրոսյանը:
«Գյուղի ամբողջ տարածքը, բոլոր տները կախտահանվեն, գյուղը կապահովվի ամենօրյա պարենամթերքով՝ դրանով նվազեցնելով նրանց տնից դուրս գալու անհրաժեշտությունը»,- ասաց նա` նշելով, որ վարակակրի անմիջական շփման շրջանակը 12 հոգի է, բայց հաշվի են առել վարակի տարածման ռիսկը և մեկուսացրել ամբողջ գյուղը, որտեղ 40 ընտանիք է ապրում։
Կորոնավիրուսով հիվանդ անձը, որը 60 տարեկանից բարձր է ու հետևաբար գտնվում է ռիսկի խմբում, պետնախարարի խոսքով, շտապօգնության ավտոմեքենայով տեղափոխվել է Երևան և ընդունվել հիվանդանոց:
Մարտիրոսյանը նաև հայտնեց, որ վարակակիրը վերադարձել էր ՀՀ Արտաշատ քաղաքից, որտեղ էլ ենթադրաբար վարակվել էր:
Հիշեցնենք՝ վարակված քաղաքացին ապրիլի 2-ին առավոտյան շտապօգնության մեքենայով տեղափոխվել էր Քաշաթաղի բուժմիավորումում և մեկուսացվել, որովհետև Արցախ էր վերադարձել ՀՀ-ից՝ «վարակի օջախ» համարվող բնակավայրից:
Երկրորդ քաղաքացին, որը թեստավորվել է, եղել է ՀՀ-ից վերադարձող քաղաքացու հարևանուհին, որը ապրիլի 4-ին այլ խնդրով տեղափոխված է եղել նույն բուժմիավորում՝ բրոնխիտի ախտանիշներով: Նրա մոտ կորոնավիրուսի վարակի առկայությունը չի հաստատվել:
Հիշեցնենք` Հայաստանում կորոնավիրուսով վարակվածների թիվը հասել է 853-ի։