Հայաստանյաց Առաքելական Սուրբ եկեղեցիներում այսօր Ծաղկազարդին նվիրված պատարագ մատուցվեց։ Կորոնավիրուսի համավարակի պատճառով առաջին անգամ ավանդաբար բազմամարդ այս արարողությունն անցավ փակ դռների հետևում։ Հավատացյալները պատարագին հետևում էին առցանց կամ հեռուստացույցով` տանը նստած։
Տոնի առիթով Մայր Աթոռ սուրբ Էջմիածնից դուրս բերվեց համաքրիստոնեական մասունքը` Սուրբ Գեղարդը, որով, ըստ ավանդույթի, խոցել են խաչին գամված Քրիստոսին։
Ամենայն հայոց կաթողիկոս Գարեգին Բ–ն Անդաստանի արարողություն կատարեց և Գեղարդով օրհնեց աշխարհի չորս կողմերը։
Ծաղկազարդը տոնում են Մեծ պահքի վերջին կիրակին։ Օրն այս խորհրդանշում է Ավագ շաբաթվա սկիզբը։
Տոնի նախօրեին Հայ Առաքելական եկեղեցին մատուցում է Ծաղկազարդի սուրբ պատարագը։
Այս օրը եկեղեցիներում օրհնում են ձիթենու կամ ուռենու ոստեր և բաժանում ժողովրդին: Ուռենու անպտուղ ոստերը խորհրդանշում են հեթանոսներին, որոնք պտղաբերեցին միայն Քրիստոսին ընծայվելուց հետո: Ոստերի փափկությունը խորհրդանշում է Քրիստոսի հետևորդների խոնարհությունը: Դրանք մեր ընծաներն են Տիրոջը, ինչպես Սուրբ Ծննդյան օրն Արևելքից մոգերի բերած ընծաները:
Ինչու է դուրս բերվել Սուրբ Գեղարդը. ժանտախտին հաղթած սրբությունն ընդդեմ կորոնավիրուսի
Ծաղկազարդին հաջորդող շաբաթը, որն ավարտվում է Սուրբ Հարության տոնով (Զատիկ) կոչվում է Ավագ շաբաթ։ Ավագ է կոչվում նաև այս շաբաթվա յուրաքանչյուր օրը (Ավագ Երկուշաբթի, Ավագ Երեքշաբթի, և այլն)։ Հատկանշական է Խորհրդավոր ընթրիքը, Հիսուս Քրիստոսի դատավարությունը, տանջանքները, խաչելությունը և թաղումը։ Ավագ շաբաթվա հիմնական ծեսերը սկսվում են Ավագ Չորեքշաբթի։