ԵՐԵՎԱՆ, 3 ապրիլի – Sputnik․ ՀՀ Առողջապահության նախարարության ամենամեծ հիվանդանոցը՝ «Սուրբ Գրիգոր Լուսավորիչ» ԲԿ-ն, որտեղ բուժելու են կորոնավիրուսով վարակվածներին, բացարձակ անվտանգ է հարևան տների բնակիչների համար։
Sputnik Արմենիայի հետ զրույցում ՀՀ Առողջապահության նախարարության մամուլի քարտուղար Ալինա Նիկողոսյանը վստահեցրեց, որ նախքան բժշկական կենտրոնը COVID-19-ով հիվանդների կարիքներին հարմարեցնելու որոշում ընդունելը հաշվի են առնվել բոլոր ռիսկերը։
Ապրիլի 3-ի դրությամբ Հայաստանում վարակվածների թիվը հասել է 736-ի ։ Հաշվի առնելով թվի աճը, Առողջապահության նախարարությունը ապրիլի 2-ին որոշում է ընդունել «Սուրբ Գրիգոր Լուսավորիչ» ԲԿ-ն ամբողջությամբ հատկացնել կորոնավիրուսով վարակվածների կարիքներին։ Հիվանդանոցի ներկայիս պացիենտներին արդեն սկսել են տեղափոխել այլ բժշկական հաստատություններ։
Թե քանի պացիենտ է տեղափոխվելու այլ հիվանդանոցներ՝ Առողջապահության նախարարությունից հստակ թիվ չհայտնեցին։
«Սուրբ Գրիգոր Լուսավորիչ» ԲԿ-ի մամուլի քարտուղար Ծովինար Խաչատրյանը նույնպես վստահեցրեց, որ հիվանդանոցը լիովին անվտանգ է թաղամասի բնակիչների համար։
«Որոշ ժամանակ հիվանդանոցն ամբողջությամբ փակ կլինի։ Պացիենետներին մեզ մոտ կհասցնեն շտապօգնության մեքենաներով։ Բժիշկները ելումուտ կանեն առանձին մուտքով»,- Sputnik Արմենիայի թղթակցին ասաց Խաչատրյանը։
«Սուրբ Գրիգոր Լուսավորիչն» ամբողջությամբ կծառայի որպես ինֆեկցիոն հիվանդանոց. Թորոսյան
Նա հիշեցրեց, որ H1N1 գրիպի համաճարակի ժամանակ բժշկական կենտրոնն արդեն իսկ սպասարկել է վարակվածներին։
Հիվանդանոցում գործում է Հայաստանում ամենախոշոր հեմոդիալիզի կենտրոնը։ Խաչատրյանի խոսքով՝ ԲԿ-ն այնքան անվտանգ է, որ հեմոդիալիզ ստացող պացիենտներըը կշարունակեն բուժումը: Նրանք հիվանդանոցի տարածք կմտնեն առանձին մուտքով։ Պոլիկլինիկան և ծննդատունը նույնպես կշարունակեն աշխատել սովորական ռեժիմով։
Խաչատրյանը նշեց, որ COVID-19-ով վարակվածների կարիքների համար առանձնացված է ստացիոնար բաժանմունքը՝ 400 մահճակալով։
«Արդեն այսօր սպասում ենք կորոնավիրուսով պացիենտներին։ ԲԿ-ում նախապատրաստական աշխատանքներն ավարտին են մոտենում»,-ասաց նա։
ԲԿ-ի խոսնակը տեղեկացրեց, որ բժիշկների մի մասն արդեն վերապատրաստում են անցել, մյուս մասը կվերաորակավորվեն անհրաժեշտության դեպքում։ Բժշկական կենտրոնին կից գործում է նաև համաճարակաբանական ծառայություն։
Ինչ վերաբերում է նրանց, ովքեր բուժում էին ստանում հիվանդանոցում, դեռ երեկ նրանց տեղափոխել են քաղաքի տարբեր հիվանդանոցներ, հիմնական բեռն իրենց վրա են վերցրել «Նաիրի», «Էրեբունի», «Աստղիկ» բուժկենտրոնները։
Հայաստանում մարտի 16-ից ապրիլի 14-ը կորոնավիրուսի տարածման դեմ պայքարի նպատակով արտակարգ դրություն է հայտարարված։ Սահմանափակված է երկրիլ ելքն ու մուտքը, արգելված են հանրային միջոցառումները։ Փակ են նաև կրթական և մշակութային հաստատությունները։ Ամբողջ երկրում քաղաքացիների տեղաշարժը սահմանափակված է։ Տնից դուրս գալ կարելի է միայն ծայրահեղ անհրաժեշտության դեպքում, ունենալով անձնագիր և լրացված ձևաթուղթ։
Գյումրու ինֆեկցիոն հիվանդանոցն աշխատում է արտակարգ ռեժիմով. լուսանկարներ