ԵՐԵՎԱՆ, 31 մարտի - Sputnik. Ապրիլի 6-ին Երևանից ՌԴ մեկնող ինքնաթիռն անհրաժեշտ բժշկական պարագաներ ու սարքավորումներ կներկրի Հայաստան: Այս մասին այսօր լրագրողների հետ հանդիպմանը հայտնեց ՀՀ փոխվարչապետ, պարետ Տիգրան Ավինյանը:
«Մեզ անհրաժեշտ այլ պարագաների թվում նաև 60 000 հատ թեստ է ներկրվելու»,- ասաց Ավինյանը:
Նա նաև հայտնեց, որ Հայաստանում գիտական մակարդակով քննարկվում է կորոնավիրուսի ախտորոշման տեղական թեստերի արտադրության հարցը: Կառավարությունը խոստացել է դրանով զբաղվող գիտական ինստիտուտին աջակցել ինչպես հումքի տրամադրմամբ, այնպես էլ մարդկային ռեսուրսներով:
«Ինչպես նաև հենց հիմա, հենց այս փուլում փորձում ենք հասկանալ, թե որքան հատուկ սարքավորումներ պետք է ներմուծենք, որոնք որ թեստերն ավտոմատացված ռեժիմով կիրականացնեն»,- ասաց Ավինյանը:
Կորոնավիրուսով վարակվածներից 30–ի վիճակը ծանր է. Փաշինյան
Պարետը հայտնեց, որ ներկա հաշվարկներով Հայաստանում նախատեսվում է շուրջ 100 000 տեղական թեստեր արտադրել, եթե կառավարությանը հաջողվի ապահովել բոլոր անհրաժեշտ պայմանները: