ԵՐԵՎԱՆ, 30 մարտի – Sputnik. ՀՀ Տավուշի մարզի Ոսկեվան համայնքում այսօր երեկոյան ադրբեջանական գնդակից դպրոցական երեխա է վիրավորվել: Sputnik Արմենիայի հետ զրույցում լուրը հաստատեց ՀՀ ՊՆ խոսնակ Շուշան Ստեփանյանը:
Նրա տեղեկություններով՝ վիրավոր երեխան այժմ գտնվում է Նոյեմբերյանի բժշկական կենտրոնում, որտեղ նրան վիրահատում են։
Ստեփանյանն ասաց, որ Պաշտպանության նախարարությունը քիչ անց հանդես կգա դեպքի վերաբերյալ պաշտոնական հայտարարությամբ:
Հիվանդանոցից էլ Sputnik Արմենիային ասացին, որ երեխան այժմ վիրաբուժական բաժանմունքում է, սակայն նրա վիճակի մասին հրաժարվեցին մանրամասներ հայտնել:
Նշենք, որ որոշ տեղեկություններով (որոնք այս պահին ոչ հերքվել, ոչ էլ հաստատվել են)՝ հրադադարի ռեժիմի խախտման արդյունքում վիրավորում են ստացել նաև հայաստանյան զինուժի սահմանապահ ուժերի երկու զինծառայողներ: