ԵՐԵՎԱՆ, 26 մարտի – Sputnik. Ռուսաստանի կառավարությունը Ռոսավիացիային հանձնարարել է մարտի 27-ից ամբողջովին դադարեցնել կանոնավոր ու չարտերային ավիահաղորդակցությունը։
Խոսքը Ռուսաստանից այլ երկրներ և այլ երկրներից Ռուսաստան իրականացվող չվերթերի մասին է։ Բացառություն կլինեն միայն չվերթերը, որոնք կապված են կորոնավիրուսի տարածմամբ պայմանավորված ռուսաստանցիերին հայրենիք վերադարձնելու հետ։ Սահմանափակումները չեն վերաբերի չվերթերին, որոնք իրականացվում են կառավարության առանձին որոշումներով։
Հիշեցնենք՝ մարտի 11-ին ԱՀԿ–ն կորոնավիրուսի բռնկումը համավարակ է հայտարարել և կոչ արել պետություններին միանալ վարակի դեմ ակտիվ պայքարին։
ԱՀԿ վերջին տվյալների համաձայն՝ աշխարհում արդեն ավելի քան 414 հազար վարակված կա, ավելի քան 18 հազարը մահացել են։
Մնացե՛ք տանը հանուն մտերիմների. «Ռոսիա սեգոդնյան» ընդդեմ կորոնավիրուսի
Ջոն Հոփքինսի համալսարանի վիճակագրության համաձայն՝ ավելի քան 471 հազար մարդ վարակվել է կորոնավիրուսով, մոտ 21 հազարը մահացել են, 114 հազարը` ապաքինվել։ Մահացության թվով առաջին տեղում է Իտալիան (ավելի քան վեց հազար մահացած), հետո Չինաստանը, Իսպանիան, Իրանը, Ֆրանսիան ու ԱՄՆ-ն։