ԵՐԵՎԱՆ, 25 մարտի – Sputnik. Մարտի 25-ին ՀՀ փոխվարչապետ, պարետ Տիգրան Ավինյանի գլխավորությամբ տեղի է ունեցել պարետատան հերթական նիստը, որի ընթացքում Ավինյանը չի բացառել՝ հնարավոր է քննարկվեն որոշ հավելյալ խստացումներ, որոնք կկիրառվեն մինչև մարտի 31-ը: Տեղեկությունը հայտնում է պարետատան մամուլի ծառայությունը։
Նա ընդգծել է, որ առաջիկա շաբաթվա ընթացքում հնարավորինս պետք է նվազեցնել մարդկանց տեղաշարժը։
«Մենք պետք է շարունակենք արդյունավետ կերպով կանխարգելել, գտնել այդ շղթաները և այդ շղթաներով կարողանալ վիրուսի հետքը մեր տեսադաշտում պահել, որպեսզի նաև կարողանանք արդյունավետ պայքարել դրա հետագա տարածման դեմ»,- ասել է նա:
Ավինյանը ևս մեկ անգամ հիշեցրել է, որ այսօրվանից բոլոր քաղաքացիները համարվում են ինքնամեկուսացած և հորդորել է խստագույնս պահպանել պարետատան սահմանափակումները։ Քաղաքացիները հնարավորություն կունենան տնից դուրս գալ միայն խիստ անհրաժեշտության դեպքում՝ այցելել աշխատանքի, եթե դա թույլատրված է, բանկեր, խանութներ, դեղատներ։
Չարտերային չվերթով Ուկրաինայից Հայաստան կժամանի 62 ուղևոր․ դեսպան
Նիստի մասնակիցները անդրադարձել են կիրառվող սահմանափակումների վերահսկողության մեխանիզմներին, մթերային խանութներում և սուպերմարկետներում կուտակումներից խուսափելուն վերաբերող հարցեր:
Հիշեցնենք, որ Հայաստանում մարտի 16–ից ապրիլի 14-ը արտակարգ դրություն է հայտարարվել, իսկ երեկվանից՝ ժամը 23։59-ից, խստացվել են արտակարգ դրության սահմանափակումները․ մեկ շաբաթ ՀՀ քաղաքացիները տնից դուրս գալու համար պետք է հիմնավոր պատճառ ունենան և ներկայացնեն անձնագիր ու պարետատան սահմանած ձևաթուղթ՝ ձեռագիր կամ տպագիր լրացրած։ Սահմանափակումները խախտողները կենթարկվեն վարչական, իսկ տնից դուրս գալու հետևանքով մեկ ուրիշին վարակելու դեպքում՝ քրեական պատասխանատվության։
Պարետի որոշմամբ արգելվել են միջմարզային տրանսպորտային ուղևորափոխադրումները
Հայաստանում կորոնավիրուսով վարակվածների թիվն այսօր ժամը 10։00-ի դրությամբ 265 է, նրանցից 16-ն առողջացել է։