ԵՐԵՎԱՆ, 22 մարտի — Sputnik. ՀՀ կրթության, գիտության, մշակույթի և սպորտի նախարար Արայիկ Հարությունյանը Facebook-ի իր էջի ուղիղ եթերում համազգային ծնողական ժողով անցկացրեց։ Նա հորդորեց ծնողներին գիտակցել, որ սա արձակուրդ չէ, այլ արտակարգ դրություն, ինչը նշանակում է, որ երեխաները դրսում չպետք է խմբակային խաղեր խաղան, ընդհակառակը սա ժամանակահատված է, երբ երեխաները կարող են ավելին սովորել, ավելի շատ գրքեր կարդալ, առցանց ներկայացումներ ու ֆիլմեր դիտել, ինչպես նաև պարտադիր մասնակցել առցանց ուսուցմանը, որպեսզի դասերից հետ չմնան։
«Վստահ եմ , որ հետևում եմ պարետատան, առողջապահության նախարարության և ԿԳՄՍ նախարարության ցուցումներին։ Շատ կարևոր է, որ շարունակեք պահպանել սանիտարահիգենիկ նորմերը։ Երեխաները պետք է մնան տանը, քանի որ արտակարգ դրությունը հայտարարված է հենց դրա համար և սա առիթ չէ, որպեսզի երեխաները բակում խմբերով խաղան»,–ասաց նախարարը։
Նախարարը ծնողներին հորդորեց հետևել առցանց ուսուցման վերաբերյալ միայն պաշտոնական տեղեկությանը՝ նշելով, որ հայտնվել են ինչ–որ կազմակերպություններ, որոնք վճարովի ծառայություններ են մատուցում առցանց ուսուցումը կազմակերպելու համար։
Որպեսզի երեխաները չհոգնեն անընդհատ նստելուց և պահպանեն ակտիվությունը, նախարարը շեշտեց, որ Հանրային հեռուստաընկերությամբ կհեռարձակվեն նաև ֆիզկուլտուրայի պարապունքներ։
«Ընկեր Մարտիրոսյան, «չոռնիից» հանեք, դասը սովորել եմ»․ ԿԳՄՍ նախարարի գրառման արձագանքները
Հիշեցնենք, որ ՀՀ կառավարության որոշմամբ՝ կրթական հաստատությունների աշխատանքը մեկ շաբաթով՝ մարտի 1-9-ը, դադարեցվել էր ՀՀ-ում առաջին կորոնավիրուսի դեպքի հաստատումից հետո։ Դպրոցներում և բուհերում դասապրոցեսն սկսելուց 5 օր անց՝ մարտի 13-ին, կրկին որոշվեց դադարեցնել կրթական հաստատությունների աշխատանքը։
Իսկ մարտի 16-ին ՀՀ-ում արտակարգ դրություն հայտարարվեց, որը կտևի մինչև ապրիլի 14-ը։
Այս պահի դրությամբ ՀՀ-ում արձանագրվել է կորոնավիրուսով վարակվելու 190 դեպք։