ԵՐԵՎԱՆ, 20 մարտի — Sputnik. Կառավարության մամուլի կենտրոնում կայացած ասուլիսի ժամանակ ՀՀ ԶՈՒ ռազմաբժշկական վարչության պետ, գնդապետ Սահակ Օհանյանը հայտնեց, որ այսօր, ժամը 19։00–ի դրությամբ հայկական Զինված ուժերում կորոնավիրուսով վարակվելու որևէ դեպք չի գրանցվել:
«Փետրվարի 25–ին Զինված ուժերի ղեկավար կազմի խորհրդակցությունից հետո ԶՈՒ–ն անցավ խիստ հակահամաճարակային իրավիճակում գործելու ռեժիմի։ Բոլոր զորամասերում բժշկական ծառայությունն անցավ ուժեղացված աշխատանքի, կրկնապատկվեցին ջանքերը։ Զորամասերում արգելեցին ժամկետային զինծառայողներին այցերը, ինչպես նաև նրանց արձակուրդի տրամադրումը»,–ասաց Օհանյանը։
Նրա խոսքով` վերահսկողության տակ են վերցրել ՀՀ տարածքից դուրս գտնվող զինծառայողներին, որոնք ուսում էին ստանում դրսում կամ էլ արձակուրդում էին։
Օհանյան հայտնեց, որ ներկա իրավիճակը կարծես զորավարժություն լինի ԶՈՒ–ի համար, և իրավիճակը մոտեցվել է պատերազմական դրության ռեժիմին։
Բոլոր կայազորերում կան զինվորական ռազմաբժշկական հաստատություններ, որոնք, գնդապետի խոսքով, հագեցվել են անհրաժեշտ հավելյալ բժշկական պարագաներով։
Կորոնավիրուսի դեմ պայքարի համար հավաքված գումարն անցել է 300 մլն դրամից
Հարցին, թե ի՞նչ քայլեր են իրականացվում պայմանագրային զինծառայողների դեպքում, որոնք տնից են մեկնում զորամասեր, Օհանյանը պատասխանեց` նրանց հորդորել են հավաքույթների չմասնակցել ու զգոն լինել։ Բացի այդ, առավոտյան չափում են պայմանագրային զինծառայողների ջերմությունը, եթե որևէ մեկը ջերմություն է ունենում, նրան մեկուսացնում են։ ՀՀ ԶՈՒ ռազմաբժշկական վարչության պետը վստահեցրեց` մինչ օրս կորոնավիրուսի ախտանշաններով որևէ դեպք չի եղել ԶՈՒ–ում, սակայն եղել են սուր շնչառական վարակման դեպքեր։
«Ի դեպ, քանի որ Զինված ուժերում շարժ չկա ներսից դուրս և հակառակը, այս ամենը բերեց նրան, որ սուր շնչառական և այլ հիվանդությունների տարածումը զգալիորեն նվազեց։ Վերջին 10 տարիների ընթացքում նման պատկեր չէր եղել»,–ասաց Օհանյանը։
Նա նշեց նաև, որ արտակարգ դրության ավարտից հետո զինծառայողները կկարողանան իրենց հասանելիք արձակուրդն օգտագործել ու մեկնել տուն։
Օհանյանը հայտնեց նաև, որ զորակոչի հնարավոր հետաձգման դեպքում հանրությունը կիրազեկվի։
Նիկոլ Փաշինյանն ընդունել է ԱԱԾ–ի և ոստիկանության նորանշանակ ղեկավարներին. տեսանյութ
Հիշեցնենք, որ փետրվարի 25-ից ՀՀ ԶՈւ բոլոր զորամասերում արգելված են զինծառայողների ծնողների և հարազատների այցելությունները, պարտադիր ժամկետային զինծառայողների բոլոր տեսակի արձակուրդները, այդ թվում՝ բուժման նպատակով տրամադրվող արձակուրդները (բացառությամբ «Ես եմ» ծրագրով զինվորական ծառայություն անցնող զինծառայողների):
Մարտական հերթափոխի մեկնող զինծառայողներն անցնում են պարտադիր բժշկական զննում