ԵՐԵՎԱՆ, 20 մարտի — Sputnik. Կառավարության մամուլի կենտրոնում այսօր` մարտի 20-ին տեղի ունեցած ասուլիսում ՀՀ Կենտրոնական բանկի խորհրդի անդամ Արթուր Ստեփանյանը հայտարարեց, որ առաջիկա ամիսներին գնաճը Հայաստանում մնալու է ցածր մակարդակի վրա:
«Երբ նայում ենք աշխարհում տեղի ունեցող իրադարձություններին և նրան, թե ինչ ջանասիրությամբ է ՀՀ կառավարությունն առաջին անհրաժեշտության ապրանքներին ու գներին վերաբերվում, ապա կարող ենք վստահաբար ասել, որ այստեղ որևէ ռիսկ չենք տեսնում գնաճի ավելացման հետ կապված»,-ասաց նա:
Բացի այդ, Ստեփանյանի խոսքով, ԿԲ-ը ևս իր բոլոր գործողություններն ուղղում է ֆինանսական կայունության ապահովմանն ու տնտեսական ակտիվության խթանմանը: ԿԲ ներկայացուցիչը վստահեցրեց, որ ունեն անհրաժեշտ պահուստներ՝ հնարավոր բացասական զարգացումների ազդեցությունները մեղմելու համար:
Գնաճ և մակրոտնտեսական կայունություն` համավարակի պայմաններում. Sputnik–ի ռադիոեթերը
Sputnik Արմենիայի հիշեցմանն այն մասին, որ այս օրերին ամենակտրուկ թանկացած ապրանքները՝ ալկոգելն ու բժշկական դիմակներն ընդգրկված չեն առաջին անհրաժեշտության այն ապրանքների զամբյուղում, որոնց գների վրա հիմնվելով, Ազգայի վիճակագրական ծառայությունը հաշվարկում է գնաճը, Արթուր Ստեփանյանը պատասխանեց, որ իրենք հանդես կգան նման առաջարկով ու առաջիկա գնաճի հաշվարկում այդ ապրանքների գները ևս կդիտարկվեն: