Մարիա Նաումենկո, Sputnik
ԵԱՏՀ սանիտարական, բուսասանիտարական և անասնաբուժական միջոցների վարչության տնօրեն Իգոր Գաևսկին Sputnik-ի հետ զրույցում հայտնեց, որ Եվրասիական տնտեսական միության պետությունների սանիտարահամաճարակային ոլորտի պատասխանատու մարմինների ղեկավարները կանոնավոր հանդիպումներ են անցկացնում կորոնավիրուսի հետևանքով ստեղծված իրավիճակը քննարկելու համար։
«Փետրվարից կանոնավոր հանդիպումներ են անցկացնում հինգ երկրի գլխավոր սանիտարական բժիշկները։ Բացի այդ, ժողովներին միանում են նաև ԱՊՀ գործընկերները, մասնավորապես՝ Տաջիկստանը և Ուզբեկստանը»,– ասաց նա։
Նա նշեց, որ ժողովները տեսահարթակներում են անցկացվում։ Կողմերը քննարկում են՝ ինչ կանխարգելիչ միջոցներ է պետք ձեռնարկել վարակի դեմ, որքան է պետք մարդկանց պահել կարանտինում, ինչ սահմանափակումներ է պետք կիրառել երկրից երկիր և պետության սահմաններում տեղաշարժվելու վերաբերյալ, բավարար քանակով թեստեր կան, թե ոչ և այլն։
«Վերջին հանդիպման ընթացքում քննարկեցինք՝ ինչ է հիմա կատարվում, ով ինչ միջոցներ է կիրառում ու ինչ է նախատեսում անել հեռանկարում։ Զգուշանում են լուրջ կանխատեսումներ անել, թեև այս ամենի մեջ խուճապային հայեցակետեր էլ չեն տեսնում։ Մասնագետները կարծում են, որ խնդիրը լուրջ է, բայց կարելի է կառավարել։ Այսինքն՝ կարելի է սահմանափակել վարակի տարածումն ու վերահսկել իրավիճակը, ծառայությունները հիմա հենց դրանով են զբաղվում», - ընդգծեց Գաևսկին։
Նրա խոսքով՝ բոլոր երկրները ներկայացնում են իրենց մշակումները, Ռուսաստանը Միության ամենամեծ գործընկերն է։ Ավելի վաղ Ռոսպոտրեբնադզորը 80 հազար լաբորատոր համալիր է փոխանցել Եվրասիական տնտեսական հանձնաժողովի անդամներին, նաև Ուզբեկստանին ու Տաջիկստանին COVID-19 կորոնավիրուսի թեստեր անցկացնելու համար։
Իրանում 3 տասնյակի չափ հայեր կան, որոնք վարակված են կորոնավիրուսով. Սինանյան
«Ռուսաստանն օգնում է բոլորին, ով օգնություն է խնդրում։ Ռոսպոտրեբնադզորի մշակած թեստ-համակարգերը տրամադրում են բոլորին, ում պետք է», - ասաց վարչության ղեկավարը։
Նա ավելացրեց, որ Հայաստանի ու Ղրղզստանի նախաձեռնությամբ հանձնաժողովը որոշել է զրոյացնել կամ նվազեցնել բժշկական որոշ ապրանքների տուրքերը՝ դրանց մատակարման խաթարումներից խուսափելու համար։
ԵԱՏՀ կոլեգիայում ստեղծվել է աշխատանքային խումբ, որը լուծում է ներկայիս իրավիճակում ԵԱՏՄ տարածքում տնտեսական կայունության ապահովման, ապրանքների փոխադարձ վաճառքի ու աշխատուժի ազատ տեղաշարժման հարցերը։
«Մենք հասկանում ենք, որ Միության երկրներում շատ մարդիկ աշխատում են միմյանց հետ, գալիս–գնում են։ Այսօր երկրներն աննախադեպ միջոցներ են կիրառում, մասամբ փակվում են սահմանները, սահմանափակվում է քաղաքացիների տեղաշարժը։ Այնպես որ աշխատանքային խումբը ժամանակին ստեղծվեց։
Վերջին տվյալների համաձայն՝ Ռուսաստանում կորոնավիրուսով վարակվելու 147 դեպք է գրանցվել, Ղազախստանում՝ 44։ Ղրղզստանում երեք վարակված կա, Բելառուսում 51 դեպք է հաստատվել, Հայաստանում՝ 122։
Առողջապահության համաշխարհային կազմակերպությունը մարտի 11-ին COVID-19 նոր կորոնավիրուսի բռնկումը համավարակ է հայտարարել։ Ընդհանուր առմամբ աշխարհում ավելի քան 200 մարդ է վարակվել աշխարհի մոտ 160 երկրում, ավելի քան 8 հազար մարդ մահացել է։