ԵՐԵՎԱՆ, 18 մարտի –Sputnik. Օրհասական պահերին հայերի միասնությունը ոչ միայն զարմացնող,այլև հիացնող է։ Մեր հայրենակիցները Չինաստանից, Լեհաստանից, Գերմանիայից, Ֆրանսիայից, Պորտուգալիայից, Ավստրալիայից, Իսպանիայից, Մալթայից ոգեշնչող ու հուսադրող խոսքերով վստահեցնում են,որ ամեն ինչ անցնելու է։
Իտալիայում ապրող Անին ժպիտով պատմում է, որ կորոնավիրուստի տարածման առաջին օրերին շատ անլուրջ են վերաբերվել իրավիճակին, հետո հասկացել են, որ անհրաժեշտ է դիմել կանխարգելիչ միջոցների։
Լեհաստանում գտնվող Նորիկը հորդորում է խուճապի չմատնվել և հանգստություն պահպանել։ Հիշում է, որ իրենք էլ են խուճապի մատնվել, երբ կեղծ լուրեր են տարածվել, որ Լեհաստանում երկու շաբաթով փակվելու են բոլոր սուպերմարկետները, մարդիկ ահռելի քանակությամբ գնումներ են կատարել։
Ֆրանսիայում բնակվող Արան ձեռքում ձևաթուղթ ունի, որը հասանելի է ներքին գործերի նախարարության կայքում։ Տանից դուրս գալուց առաջ պետք է անպայման լրացնել այդ թուղթը և նշել դուրս գալու պատճառը, հակառակ դեպքում ստիպված կլինեն տուգանք վճարել։
Հավելենք, որ վերջին տվյալներով Հայաստանում արձանագրվել է կորոնավիուսով վարակման 115 դեպք:
Արդյունքների համաճարակաբանական վերլուծությունը ցույց է տալիս, որ արձանագրված 99 դեպքերը կապ ունեն Էջմիածնում ու երևանյան ձեռնարկությունում հայտնաբերված վարակի դեպքերի հետ։ Բոլոր պացիենտների առողջական վիճակը բժիշկները գնահատում են բավարար:
Վարակման առաջին դեպքի մասին հայտնի դարձավ մարտի 1-ի վաղ առավոտյան. վարակվածը 29-ամյա տղամարդ էր, որն Իրանից Հայաստան էր ժամանել փետրվարի 28-ին: Նա արդեն դուրս է գրվել հիվանդանոցից։
Հայաստանում մարտի 16–ից արտակարգ դրություն է հայտարարվել։