ԵՐԵՎԱՆ, 18 մարտի - Sputnik. Ցեմենտի արտադրության պետական տուրքը մեկ տոննայի դիմաց կպահպանվի 14000 դրամի սահմաններում ՝ առայժմ մինչև դեկտեմբերի 31-ը։ Այս մասին այսօր ԱԺ տնտեսական հարցերի հանձնաժողովի նիստում հայտարարեց էկոնոմիկայի փոխնախարար Ավագ Ավանեսյանը՝ ներկայացնելով պետտուրքի մասին օրենքում կառավարության առաջարկած փոփոխության նախագիծը։
«Մայիսին արդեն լրացուցիչ գործիքներով հանդես կգանք՝ կապված նրանից, թե լրացուցիչ ինչ շոկեր տեղի կունենան՝ կապված վերջին միջազգային զարգացումների հետ»,- ասաց նա։
Ինչ վերաբերում է ներկա վիճակին, ապա փոխնախարարի դիտարկմամբ՝ Իրանից ներկրվող ցեմենտի գներն անբնական ցածր մակարդակի են, ինչը պետտուրքի ավելացման դեպքում լուրջ սպառնալիք կարող է դառնալ հայաստանյան ցեմենտի արտադրության համար։
Իսկ թե ինչու է իրանական ցեմենտի գինն «անբնական» անկում ապրել՝ փոխնախարարը 3 հիմնական պատճառ առանձնացրեց։
«Իրանի տնտեսության աննախադեպ անկումը, ազգային արժույթի արժեզրկումն ու Իրանի նկատմամբ կիրառված տնտեսական սանկցիաների հետևանքով Իրանում արտադրվող ցեմենտի հումքի՝ կլինկերի պահանջարկն աննապադեպ ընկել է, ինչն էլ հանգեցրել է գների անկման»,- նշեց Ավանեսյանը։
Սայլը տեղից շարժվեց, մնաց` տեղ հասնի. «Արարատցեմենտում» ոգևորված չեն նոր նախագծով
Նշենք, որ այսօր Հայաստանում գործող օրենքով ներմուծվող ցեմենտի ու կլինկերի նկատմամբ պետական տուրք չի կիրառվում, իսկ Հայաստանում արտադրված ցեմենտի վրա 2019թ-ի հուլիսից սկսած` 1 տոննայի դիմաց 14 000 դրամի չափով տուրք է սահմանված։
Արդյունքում` «Արարատ ցեմենտ» գործարանում արտադրված տեղական ցեմենտի ինքնարժեքը կազմում է 36 200 դրամ, «Հրազդան ցեմենտ»–ում արտադրվածը` 39 500 դրամ։
Հայաստանը ճիշտ է վարվել` պաշտպանելով իր շուկան. ԵԱՏՄ ցեմենտ արտադրողների միության ղեկավար
Մինչդեռ, Իրանից ներկրվող ցեմենտի ինքնարժեքը 2019թ-ի տվյալներով, Էկոնոմիկայի նախարարության հաշվարկներով, շուրջ 18 000 դրամ է, իսկ Իրանից ներկրված կլինկերից ՀՀ–ում արտադրված ցեմենտի ինքնարժեքը` 26 000 դրամ։