Որոշ ավիաընկերություններ դադարեցնում են իրենց թռիչքները

ԵՐԵՎԱՆ, 17 մարտի — Sputnik. Հաշվի առնելով աշխարհում նոր տիպի կորոնավիրուսի տարածումը՝ մի շարք ավիաընկերություններ որոշում են կայացրել  չվերթերը ժամանակավորապես չեղարկելու մասին։ Տեղեկությունը հաղորդում է Քաղաքացիական ավիացիայի կոմիտեն։ Այս պահի դրությամբ դեպի Հայաստան թռիչքներ իրականացնող 15 ավիաընկերություն հայտարարել են գրեթե 20 ուղղություններով չվերթերը ժամանակավորապես դադարեցնելու մասին։

Դրանք են «Արմենիա Էյրվեյզ» (դեպի Թեհրան և Անապա), «Ռայանէյր» (դեպի Հռոմ և Միլան),  «Ավիակոմպանիա Արմենիա» (Մոսկվա, Լիոն և Թել Ավիվ), «Քաթար Էյրվեյզ» (Դոյա),«Բելավիա (Մինսկ), «Ուրալ Էյրլայնզ» (Եկատերինբուրգ), «Էյր Կաիրո» (Շարմ էլ Շեյխ), «Էյր Արաբիա» (Շարժա), «ԼՈՏ Փոլիշ Էյրլայնզ» (Վարշավա), «Ուկրաինայի միջազգային ավիաուղիներ» (Կիև), «Միդլ Իսթ Էյրլայնզ» (Բեյրութ), «Ֆլայդուբայ» (Դուբայ), «Սքայ Ափ Էյրլայնզ» (Կիև), «Ավստրիական ավիաուղիներ» (Վիեննա), «Բրասելս Էյրլայնզ» (Բրյուսել) ավիաընկերությունները։

Ինչպես Sputnik Արմենիային հայտնեցին Քաղաքացիական ավիացիայի կոմիտեից՝ այս ցանկն անընդհատ թարմացվում և լրացվում է։

Արտակարգ դրության պատճառով աշխատանքից հեռացվածների իրավունքները ո՞վ կպաշտպանի

Նշենք, որ կորոնավիրուսի բռնկման այս օրերին վնասները զգալի են համաշխարհային տուրիզմի և ավիափոխադրումների ոլորտներում։ Գործնական ճանապարհորդությունների համաշխարհային ասոցիացիայի (GBTA) հաշվարկներով՝ ամբողջ աշխարհում չեղարկված գործնական ճամփորդությունների հետևանքով գործարարների կորուստները կարող են հասնել մինչև 820 միլիարդի։ Ուղևորությունների և տուրիզմի համաշխարհային կազմակերպության ղեկավար Գլորիա Գևարայի խոսքով՝ 2020 թվականին կորոնավիրուսի հետևանքով տուրիզմի մասնաբաժինը կարող է կրճարտվել ¼-ով, ինչի հետևանքով մոտ 50 միլիոն մարդ կարող է գործազուրկ դառնալ։

Հայաստանում կորոնավիրուսով վարակվածների թիվը հասավ 72-ի

Ամբողջ աշխարհում տարբեր ուղղություններով չեղարկված հարյուրավոր չվերթերի պատճառով  ահռելի կորուստներ են կրում ավիաընկերությունները։ Օդային տրանսպորտի միջազգային ասոցիացիայի (IATA)-ի լավատեսական հաշվարկներով՝ ուղևորափոխադրումների ոլորտում ավիաընկերությունների կորուստները կհասնեն մոտ 63 միլիարդ դոլարի․սա այն դեպքում, եթե աշխարհը կարողանա մոտալուտ ժամանակներում հաղթահարել կորոնավիրուսը, իսկ եթե Covid 19-ի տարածումը շարունակվի, ապա վնասները կհասնեն մոտ 119 միլիարդի։