ԵՐԵՎԱՆ, 17 մարտի — Sputnik. ՀՀ պաշտպանության նախարարությունում այսուհետ դադարեցվում է քաղաքացիներից, հասարակական կամ այլ կազմակերպություններից թղթային տարբերակով դիմումների, գրությունների և առաջարկությունների ընդունումը։ Սա պայմանավորված է համաճարակային իրավիճակով և կտևի մինչև իրավիճակի կարգավորումը: Տեղեկությունը հաղորդում է Հայկական միասնական տեղեկատվական կենտրոնը։
Նշվում է, որ դիմումները, գրությունները և առաջարկությունները կարելի է ուղարկել էլեկտրոնային տարբերակով, իսկ հարցերի դեպքում աշխատանքային օրերին ժամը 09:00-ից 18:00-ը զանգահարել ՀՀ ՊՆ թեժ գիծ:
Հիշեցնենք` նոր տիպի կորոնավիրուսի տարածումը կանխարգելելու նպատակով Հայաստանի Հանրապետությունում երեկվանից արտակարգ դրություն է սահմանվել, որն ուժի մեջ կլինի մինչև ապրիլի 14–ը։
Արտակարգ դրության ռեժիմի խախտումներ են արձանագրվել
Հայաստանի Հանրապետությունում այս պահի դրությամբ կորոնավիրուսով վարակվելու 72 հաստատված դեպք կա։ Առաջին վարակվածն արդեն առողջացել ու դուրս է գրվել հիվանդանոցից։