ԵՐԵՎԱՆ, 17 մարտի — Sputnik. Առողջապահության նախարարությունը մինչև այս շաբաթվա վերջ կորոնավիրուսի ախտորոշման 5000 նոր թեստ կունենա: Կառավարության մամուլի կենտրոնում տեղի ունեցած ասուլիսի ժամանակ տեղեկությունը հաղորդեց առողջապահության փոխնախարար Լենա Նանուշյանը։
Ինչ են քաղաքացիներն ամենաշատը գնել այս օրերին. արդյո՞ք խուճապի առիթ կա
«Կորոնավիրուսի ախտորոշման թեստերի քանակը բավարար է։ Թեստերի ձեռքբերման պրոցեսը շարունակական բնույթ է կրում, այսինքն, նոր խմբաքանակը ստանալուն զուգահեռ` մենք նաև ուրիշ խմբաքանակ ստանալու քայլերն ենք անում»,–ասաց փոխնախարարը։
Նանուշյանի խոսքով` թեստավորվում են այն քաղաքացիները, որոնք ունեն ախտանշաններ` ջերմություն, հազ, այցելել են այլ երկրներ։ Բացի այդ, թեստավորվում են նրանց, ովքեր շփվել են կորոնավիրուսով վարակակրի հետ ու ունեն ախտանշաններ։
Անդրադառնալով կորոնավիրուսով 64 վարակակիրներից երկու թոքաբորբ ունեցողներին`փոխնախարարը նշեց, որ նրանք միջին տարիքի են և թեթև են տանում թոքաբորբը։ Նանուշյանը վստահեցնում է` նրանց բուժումն արդյունավետ է լինելու։
Հիշեցնենք, որ մարտի 17-ին, ժամը 12:00-ի դրությամբ իրականացված կորոնավիրուսային հիվանդության թեստավորման արդյունքում հաստատվել է ևս 12 դեպք, որոնցից 6-ը փոխկապակցված են Էջմիածնի դեպքի հետ, իսկ մյուս 6-ը՝ արտադրամասի: Վերջններս ի սկզբանե եղել են մեկուսացված:
Ընդհանուր առմամբ` Հայաստանում կորոնավիրուսով վարակվելու 64 դեպք է գրանցվել։