ԵՐԵՎԱՆ, 17 մարտի – Sputnik. Հայաստանում կորոնավիրուսով վարակվածների թիվը դարձավ 78։ Տեղեկությունը Facebook—ի ուղիղ հեռարձակման ժամանակ հաղորդեց ՀՀ առողջապահության նախարար Արսեն Թորսոյանը։ Նրա խոսքով` 18 վարակակիրները ոչ մի ախտանշան չեն ունեցել։ Իսկ վեց նոր դեպքերն էլ կապված են եղել արտադրամասի վարակակիրի հետ։
«Եթե չհետազոտվեին, չէին էլ իմանա։ Մյուսներից միայն 2-ի մոտ էր թոքաբորբ հայտնաբերվել, հնարավոր է` բուժվել է, դեռ չգիտեն, որովհետև ռենտգեն հետազոտությամբ է դա պարզ դառնում, ռենտգենը ցուցված է 7-րդ օրը»,–ասաց նախարարը:
Նա նաև տեղեկացրեց, որ 600 մարդ արդեն մեկուսացված են։
Նշենք, որ Հայաստանում վարակված անձանց ընդհանուր թիվը մարտի 17–ի ժամը 18։00–ի դրությամբ 72-ն էր, մեկն արդեն առողջացել է։ Այս պահին նրանց ավելացավ ևս 6–ը։
Հայաստանում կորոնավիրուսի առաջին դեպքի մասին հայտնի դարձավ մարտի 1-ի վաղ առավոտյան. վարակվածը 29-ամյա տղամարդ էր, որն Իրանից Հայաստան էր ժամանել փետրվարի 28-ին: Նա արդեն դուրս է գրվել հիվանդանոցից։ Մարտի 11-ին ՀՀ–ում կորոնավիրուսի երեք նոր դեպք հայտնաբերվեց։
Կորոնավիրուսի հաղթահարմանն ուղղված քայլերին աջակցելու համար բացվել է գանձապետական հաշիվ
Վարակվածները եկել էին Իտալիայից։ Նրանցից մեկն Էջմիածնի բնակչուհի է և, ըստ լուրերի, գնացել էր Իտալիա` որդու ընտրյալի համար հարսանյաց զգեստ գնելու, այնուհետև Էջմիածնում մասնակցել էր որդու նշանադրությանը։ Դրանից հետո վարակակիրների թիվը սկսեց աճել։
Մարտի 16-ին ՀՀ վարչապետ Նիկոլ Փաշինյանը հայտնեց, որ կորոնավիրուսի դեպք է արձանագրվել նաև Երևանի արտադրական ձեռնարկություններից մեկում։
Հայաստանում մարտի 16–ից արտակարգ դրություն է հայտարարվել։