ԵՐԵՎԱՆ, 17 մարտի- Sputnik. Ստեղծվել է գիտնականներից, տվյալագետներից, ՏՏ, արհեստական բանականության մասնագետներից կազմված աշխատանքային խումբը, որն առողջապահության նախարարության հետ համագործակցությամբ զբաղվելու է համաճարակային տվյալների հավաքագրմամբ, վերլուծությամբ, միջազգային տվյալների համադրմամբ, ինչը թույլ կտա որոշակիորեն կանխատեսել իրավիճակն ու գնահատականներ տալ։ Այս ամենի նպատակը կորոնավիրուսի ընդհանուր հավանական տարածման մոդելավորման իրականացումն է: Բարձր տեխնոլոգիական արդյունաբերության նախարար Հակոբ Արշակյանն այսօր կառավարության պաշտոնական Youtube-ի ալիքի ուղիղ եթերում ներկայացրեց, թե ինչ միջոցառումներ են իրականացվում թվային ենթակառուցվածքների, կապի, հեռահաղորդակցության ոլորտում՝ դրանց անխափան աշխատանքն ապահովելու համար։
«Մենք հանդիպումներ ենք ունեցել հեռահաղորդակցության ոլորտի մեծ ընկերությունների հետ և հավաստիացել, որ հեռահաղորդակցության սպասարկման՝ թե ինտերնետի, թե բջջային ծառայությունների տեսանկյունից որևէ խնդիր չունենք»,- ասաց նախարարը։ Նրա խոսքով՝ տարբեր մարմիններում վերհանված են նաև խոցելի տեխնիկական օղակները, կարգավորված է անհրաժեշտության դեպքում տվյալ օղակների փոխարինելության հարցը, հետևաբար բոլոր ռիսկերը կառավարելի են։
Հայաստանում արտակարգ դրությունը համակարգող պարետատունն առաջին նիստն է գումարել
Նախարարը ողջունեց այն հանգամանքը, որ հեռահաղորդակցության ոլորտում գործող ընկերությունների շատերն անցել են առցանց աշխատանքի, ինչը նվազեցնում է շփումներն ու հետևաբար նաև վիրուսի տարածումը։ Վճարումների տեսանկյունից նախարարը խնդիր չի տեսնում, որովհետև առցանց վճարումներ կատարելու հնարավորությունները շատ են։ Նա կոչ արեց քաղաքացիներին հնարավոր բոլոր վճարումները կատարել առցանց կամ տերմինալների միջոցով՝ խուսափելով մարդաշատ վայրերում լինելուց։
Արշակյանն անդրադարձավ նաև փոստի աշխատանքներին՝ նշելով, որ փոստային բաժանմունքների աշխատանքներում ոչ մի ընդհատում ու խափանում չի լինի։
«Փոստը կենսաթոշակների և կոմունալ վճարումների հիմնական օղակն է, ոչ մի ընդհատում և խափանում չի լինի, դրանք կգործեն ըստ իրավիճակի, հիմա այդպես էլ գործում են»,- ասաց նա՝ հավելելով, որ այս դեպքում էլ որոշակի միջոցներ են ձեռնարկել հնարավոր ռիսկերը նվազագույնին հասցնելու համար՝ սրահների ախտահանումից մինչև միաժամանակ նույն վայրում գտնվող մարդկանց թվի սահմանափակում։
«Այն վայրերում, որտեղ հնարավոր է կենսաթոշակներն ու սոցիալական վճարները հասցնել քաղաքացիներին, հիմնականում գյուղական համայքներում, դա կիրականացվի առավելագույն չափով»,- նշեց նա։
Նիկոլ Փաշինյանը շրջայց է կատարում սուպերմարկետներում. տեսանյութ
Նախարարի խոսքով՝ սա հնարավորություն է, որ քաղաքացիներն ավելի քիչ դուրս գան տանից, ստիպված չլինեն իրենք անձամբ հասնել բաժանմունքներ։
Նշենք, որ Հայաստանում մարտի 17–ի դրությամբ կորոնավիրուսով վարակվածների թիվը հասել է 72-ի։ Մարտի 16–ից երկրում արտակարգ դրություն է հայտարարվել։