ԵՐԵՎԱՆ, 16 մարտի - Sputnik. Կորոնավիրուսի վերջին հիվանդներից երկուսը Չարենցավանի բնակիչներ են։ Տեղեկությունը ԱԺ ամբիոնից հայտնեց ՀՀ վարչապետ Նիկոլ Փաշինյանը՝ անդրադառնալով ՀՀ առողջապահության նախարար Արսեն Թորոսյանի հայտարարած հիվանդության նոր դեպքերին։
Ավելի վաղ Թորոսյանը Facebook-ի իր էջում հայտնել էր, որ Հայաստանում կորոնավիրուսով վարակվածների թիվը ավելացել է ևս 15-ով` հասնելով 45-ի։
Մինչ այս նշվում էր 30 վարակվածների մասին, որոնցից մեկն արդեն առողջացել է։
Հայաստանում կորոնավիրուսի առաջին դեպքի մասին հայտնի դարձավ մարտի 1-ի վաղ առավոտյան. վարակվածը 29-ամյա տղամարդ էր, որն Իրանից Հայաստան էր ժամանել փետրվարի 28-ին: Նա արդեն դուրս է գրվել հիվանդանոցից։ Մարտի 11-ին ՀՀ–ում կորոնավիրուսի երեք նոր դեպք հայտնաբերվեց։
Գարեգին Բ–ն հորդոր է հղել կորոնավիրուսի առնչությամբ. համազգային աղոթքի օր է լինելու
Վարակվածները եկել էին Իտալիայից։ Նրանցից մեկն Էջմիածնի բնակչուհի է և, ըստ լուրերի, գնացել էր Իտալիա` որդու ընտրյալի համար հարսանյաց զգեստ գնելու, այնուհետև Էջմիածնում մասնակցել էր որդու նշանադրությանը։ Դրանից հետո վարակակիրների թիվը սկսեց աճել։
Մարտի 16-ին ՀՀ վարչապետ Նիկոլ Փաշինյանը հայտնեց, որ կորոնավիրուսի դեպք է արձանագրվել նաև Երևանի արտադրական ձեռնարկություններից մեկում։
Հայաստանում այսօրվանից արտակարգ դրություն է հայտարարվել։