ԵՐԵՎԱՆ, 15 մարտի-Sputnik. Կորոնավիրուսի սոցիալ-տնտեսական հետևանքները մեղմելու վերաբերյալ երեկ երեկոյան կառավարությունում խորհրդակցություն է անցկացվել։ ՀՀ փոխվարչապետ Տիգրան Ավինյանը Facebook-ի իր պաշտոնական էջում խորհրդակցության մի հատվածը ներկայացնող տեսանյութ է հրապարակել։
«Ինչպես գիտեք նոր տեսակի կորոնավիրուսը, բացի մարդկային կյանքներին և առողջությանը վնաս հասցնելուց, նաև էական վնասներ է հասցնում համաշխարհային տնտեսությանը, նաև առանձին երկրներում որոշակի խնդիրներ և բացասական երևույթներ առաջանում են։ Մասնավորապես, Հայաստանում դա շատ տեսանելի է զբոսաշրջության ոլորտում, որը և բնական է»,- ասել է փոխվարչապետը։
Խորհրդակցության նպատակն էր քննարկել տարբեր գերատեսչությունների առաջարկները, սեղմ ժամկետներում կազմել գործողությունների ծրագիր, որը թույլ կտա որոշ չափով կանխարգելելու և մեղմելու կորոնավիրուսի հնարավոր տնտեսական հետևանքները։
Կորոնավիրուսով վարակված երեխայի ուսուցիչները, դասընկերները մեկուսացված են. մանրամասներ
«Ձևավորվում է մեկ ընդհանուր շտաբ առողջապահության նախարարության, ուժային կառույցների, տեսչական մարմնի աշխատակիցների մասնակցությամբ, որը զբաղվում է որոնողական աշխատանքներով»,- հայտարարել է փոխվարչապետ Ավինյանը՝ հավելելով, որ այս պահին այդ աշխատանքները բավականին արդյունավետ են իրականացվում։
Նրա խոսքով` փոխվարչապետի գրասենյակը, առողջապահության ու արտաքին գործերի նախարարություններն աշխատելու են 24-ժամյա ռեժիմով:
Հիշեցնենք, որ մարտի 15–ի ժամը 16։00–ի դրությամբ Հայաստանում կորոնավիրուսով վարակման 23 դեպք կա, որոնցից 16-ը փոխկապակցված են Էջմիածնի հայտնի դեպքի հետ։
Քիչ առաջ հայտնի դարձավ, որ հիվանդների թվում նաև դպրոցահասակ երեխա կա։Նա սովորում է Էջմիածնի դպրոցներից մեկում։ Մեկուսացվել են երեխայի դասընկերներն ու ուսուցիչները։