ԵՐԵՎԱՆ, 15 մարտի-Sputnik. ՀՀ պաշտպանության նախարարի նորանշանակ մամուլի խոսնակ Շուշան Ստեփանյանն իր Facebook-ի էջում պաշտոնապես հերքել է համացանցում շրջանառվող տեղեկատվությունը, թե այս պահին Դիլիջանի Մոնթե Մելքոնյանի անվան ռազմամարզական վարժարանի ուսանողներին տարհանում են։
«Մոնթե Մելքոնյանի անվան ռազմամարզական վարժարանի սաներն ուսանում են ավագ դպրոցի ծրագրով, իսկ մինչև մարտի 23-ը կրթական հաստատություններում դասերն ու աշխատանքները դադարեցված են, հետևաբար վարժարանի սաներին ևս տրամադրվել է արձակուրդ»,- գրել է նա։
Ավելի ուշ Ստեփանյանը նաև նշել է, որ ՀՀ զինված ուժերում կորոնավիրուսով վարակվածներ չկան։ Հայաստանյան լրատվամիջոցներից մեկը նյութ էր հրապարակել՝ անդրադառնալով ԱՄՆ-ի զինված ուժերում կորոնավիրուսով վարակման դեպքերին՝ վերնագրում նշելով, որ «Պաշտպանության նախարարությունը հայտնել է կորոնավիրուսով վարակված 10 զինծառայողների մասին»։ Սա պատճառ էր դարձել, որպեսզի համացանցում կեղծ տեղեկատվություն տարածվեր՝ դեպքերը վերագրելով ՀՀ զինված ուժերին։
Ստեփանյանը հավելել էր, որ ոչ միայն կորոնավիրուսով հիվանդ զինվորներ չկան, այլև չկա նաև այնպիսի զինծառայող, որը շփվել է հիվանդ կամ կարանտինում գտնվող որևէ մեկի հետ։
Սլովակիայում արտակարգ դրություն է, Ավստրիան խզում է օդային կապը մի շարք երկրների հետ
Նշենք, որ ՀՀ պաշտպանության նախարարությունը կորոնավիրուսի տարածման դեմ պայքարի շրջանակներում որոշ ժամանակով դադարեցրել է զինծառայողներին արձակուրդ տրամադրելը, նաև արգելվում է այցելել նրանց։