ԵՐԵՎԱՆ, 14 մարտի — Sputnik. Երևանի քաղաքապետարանի մամուլի ծառայությունից Sputnik Արմենիային հայտնեցին, որ մոտակա օրերին վերելակների նոր խմբաքանակի համար մրցույթ կհայտարարվի։
Երևանի վարչական շրջաններում նոր վերելակներ են գործարկվել
Հունվարին հայտնի էր դարձել, որ 2020 թվականին քաղաքային իշխանությունը մտադիր է 500 վերելակ ձեռք բերել։
Քաղաքապետարանից նշեցին նաև, որ թեև մրցույթը կհայտարարվի առաջիկա օրերին, բայց հայտերի ընդունումը կարող է մինչև 2 ամիս տևել։
Քաղաքապետարանն արդեն պատրաստել է մրցույթի տեխնիկական առաջադրանքը, որտեղ նշված է, օրինակ՝ ինչ չափի պետք է լինեն վերելակները, ինչ ամրություն պետք է ունենան ճոպանները։ Շենքերը, որտեղ կտեղադրվեն նոր վերելակները, դեռ չեն ընտրվել: Մինչ այդ քաղաքային իշխանությունն ուսումնասիրում է բազմահարկ շենքերի վերելակները՝ հասկանալու համար` նախևառաջ որոնք է պետք փոխել։
Մրցույթը բաժանված է մի քանի լոտերի. դրան կարող են մի քանի մատակարար մասնակցել։
Նշենք, որ Երևանում կա նաև տեղական ձեռնարկություն, որը տեխնիկա է հավաքում։ Այն բացել է «ՌԱՖԷԼԳՐԻԳ» ընկերությունը։ Գործարանը գտնվում է Եղեգնաձորում։ Դեռ խորհրդային տարիներից մնացած գործարանը շարունակում է ռելե թողարկել ռուսական ավտոգործարանների պատվերով։ Վերելակներ հավաքելը նոր նախագիծ է, որն ընկերությունը բացել է Երևանում` Մոգիլևի վերելակների գործարանի հետ։
Նոր վերելակներ` հին շենքերում. քանի շենք կարժանանա այդ բախտին
«Ապագայում ուզում ենք որոշ մասեր տեղում արտադրել։ Հատկապես, որ մետաղի մշակման հարցում փորձ ունենք»,–նշեց ընկերության տնօրեն Ռաֆայել Գրիգորյանը։
Նրա կարծիքով` խոշոր պատվերի դեպքում ավելի հեշտ կլինի արտադրությունը կարգավորել, քանի որ այդ դեպքում աշխատանքի ինքնարժեքը կընկնի։
Նշենք` անցած տարի Երևանի քաղաքապետարանն արդեն 20 վերելակ է փոխել։ Դրանց մի մասը քաղաքապետարանը գնել է հայ-բելառուսական նախագծից։
Ընդհանուր առմամբ, մայրաքաղաքում մոտ 4600 վերելակ կա, դրանցից 3500–ը պետք է փոխարինվեն։ Մեկ վերելակ փոխելն արժե մոտ 10 միլիոն դրամ։
Հանրապետության այլ քաղաքներում կա ևս 400 վերելակ, որոնք ավելի անմխիթար վիճակում են։
Այս տեմպերով` վերելակների հարցը 100 տարում էլ չի լուծվի. Բաբկեն Հարությունյան