ԵՐԵՎԱՆ, 13 մարտի – Sputnik.Հայաստանում հաստատվել է կորոնավիրուսի վարակման ևս 2 դեպք։ Facebook–ի ուղիղ եթերում հայտարարեց ՀՀ առողջապահության նախարար Արսեն Թորոսյանը։
«Այդ 2 մարդիկ այս պահին հատուկ գանգատներ չունեն։ Նրանց ընտանիքներն արդեն մեկուսացված են։ Պարզում ենք` մեկուսացման կարիք ունեցող այլ անձինք կան, թե ոչ»,–ասաց նա:
Այս պահին Հայաստանում կա կորոնավիրուսի հաստատված 8 դեպք, որոնցից 5–ն այն անձանց շրջանակից են, որոնք մեկուսացվել են երեկ Էջմիածնից և կապ ունեն էջմիածնեցի կնոջ հետ։
«Արդեն վերցրել ենք այն 31 քաղաքացիների թեստերը, որոնք մարտի 1–ից էին գտնվում էին մեկուսացման մեջ, երեկոյան կլինեն այդ թեստերի պատասխանները։ Եթե կորոնավիրուս չհայտնաբերվի, նրանց կուղարկենք իրենց մշտական բնակության վայրեր»,– նշեց Թորոսյանը։
Հիշեցնենք` Հայաստանում կորոնավիրուսով վարակվելու առաջին դեպքի մասին հայտնի դարձավ մարտի 1-ի վաղ առավոտյան. վարակվածը 29-ամյա տղամարդ է: Նա Իրանից Հայաստան էր ժամանել փետրվարի 28-ին:
Մարտի 11-ին ՀՀ վարչապետ Նիկոլ Փաշինյանը հայտարարեց, որ Հայաստանում կորոնավիրուսի երեք նոր դեպք է բացահայտվել։ Երկուսը ՀՀ քաղաքացի են (45 և 27 տարեկան), մեկը՝ Իտալիայի (51 տարեկան)։
Կաթիլային է ընդունել և գնացել նշանդրեքի. մեկուսացվել են կնոջ հետ շփված ոսկերիչը, վարսավիրը
Մարտի 12-ի երեկոյան ՀՀ վարչապետն ու առողջապահության նախարարը հայտարարեցին ևս 2 նոր հաստատված դեպքի մասին։ Նրանցից մեկը վարակակիրներից մեկի ամուսինն է, մյուսը՝ մորաքրոջ տղան։ Նրանք տեղափոխվել են Նորքի ինֆեկցիոն հիվանդանոց։
Մարտի 12-ի դրությամբ Ծաղկաձորում պաշտոնապես մեկուսացված է ընդհանուր առմամբ 98 մարդ։ Նրանցից 31-ը 2 շաբաթ ժամկետով «Գոլդեն փելես» հյուրանոց են տեղափոխվել դեռ մարտի 1–ին։ Մարտի 11-ին հյուրանոց են տեղափոխել ևս 10 մարդու, իսկ մարտի 12-ին` ևս 57–ին։ Նրանք բոլորը ուղիղ շփում են ունեցել կորոնավիրուսով վարակված մարդու հետ։