ԵՐԵՎԱՆ, 12 մարտի — Sputnik. Հայաստանում այլևս համակարգային կոռուպցիա չկա, սակայն անհատապես պաշտոնյաները շարունակում են կաշառք վերցնել: Ջերմուկում սահմանադրական փոփոխությունների հանրաքվեի «Այո»–ի քարոզարշավի ժամանակ այսօր հայտարարեց Հայաստանի վարչապետ Նիկոլ Փաշինյանը։
«Երբ մենք ասում ենք համակարգային կոռուպցիա չկա, նկատի ունենք, որ վերացել է այն երևույթը, երբ պաշտոնյան վերցնում է 1000 դրամ, կեսը պահում իրեն, 200 դրամը տալիս ղեկավարին, հետո այդ ղեկավարն այդ 200-ի կեսը պահում է իրեն, կեսը տալիս իր ղեկավարին և այլն։ Հայաստանում դա այլևս չկա։ Բայց կարո՞ղ եմ արդյոք ասել, որ այսօր ոչ մի պաշտոնյա կաշառք չի վերցնում։ Իհարկե, չեմ կարող։ Մենք ամեն շաբաթ պաշտոնյա ենք բռնում կաշառքի վրա, ամեն շաբաթ», – շեշտեց վարչապետը։
Փաշինյանի կարծիքով` թեև այժմյան կառավարությունը ընդհանուր առմամբ վստահելի ինստիտուտ է ժողովրդի համար, սակայն այն իր բոլոր մակարդակներում դեռևս չի կարող վստահելի լինել։
Զորակոչիկի մորից կաշառք է վերցրել ծառայությունը հետաձգելու համար. բժշկին կալանավորել են
Նշենք, որ հետհեղափոխական Հայաստանում մի շարք խոշոր պաշտոնյաներ կաշառք վերցնելու կամ տալու կասկածանքով կալանավորվել են։ Նրանց շարքում են ԿԳՄՍ նախկին փոխնախարար Գևորգ Լոռեցյանը և Քաղաքաշինության կոմիտեի նախկին նախագահ Վահագն Վերմիշյանը։
Կաշառք են ուզել հաշմանդամության խումբը փոխելու համար. ԱԱԾ–ի բացահայտումը
Հիշեցնենք`Նիկոլ Փաշինյանը մարտի 10-ից արձակուրդ է վերցրել` Հայաստանի տարբեր մարզերում «Այո»-ի քարոզարշավ իրականացնելու համար։ Նա արդեն եղել է Սյունիքում, այժմ Վայոց ձորում է։