ԵՐԵՎԱՆ, 12 մարտի — Sputnik. ՀՀ Առողջապահության նախարարության Հիվանդությունների վերահսկման և կանխարգելման ազգային կենտրոնի վարակիչ հիվանդությունների համաճարակաբանության բաժնի պետ Լիանա Թորոսյանը պատասխանում է կորոնավիրուսային հիվանդությանը վերաբերյալ հաճախ տրվող հարցերին։ Թորոսյանը նշում է, որ Հայաստան ժամանողները մեկուսացվում են այն պարագայում, եթե նրանք գալիս են այն երկրներից, որտեղ ներկայումս դիտվում է կորոնավիրուսային լարված համաճարակային իրավիճակ։ Նրանց դիմավորվում են, ենթարկում են ջերմաչափման։
«Եթե լինում է ջերմություն կամ կորոնավիրուսի այլ տեսանելի ախտանշաններ, ապա մեկուսացվում են և հոսպիտալացվում։ Իսկ այն ուղևորները, որոնց մոտ որևէ ախտանիշ չի գրանցվում, նրանք լրացնում են իրենց բնակության վայրի հասցեական քարտերը, և նրանց նկատմամբ սահմանվում է 14–օրյա բժշկական հսկողություն»,–ասում է Թորոսյանը` հավելելով, որ օդային և սահմանային ջերմաչափումը համարվում է բավարար միջոց, որպեսզի անմիջապես կարողանան ջերմող հիվանդներին բացահայտել և հոսպիտալացնել։
Նրա հավաստմամբ` 14 օրվա ընթացքում առողջապահության նախարարության մասնագետները ժամանողներ են կատարում եկածի տուն, որից հետո հեռախոսազանգերի և պոլիկլինիկական ծառայությունների միջոցով տեղեկացվում են նրանց առողջության մասին։
ՀՀ որոշ պատվիրակությունների արտասահմանյան այցերը չեղարկվել են
Իսկ վարակվածների հետ սերտ շփում ունեցած բոլոր անձինք մեկուսացվում են և 14 օր մնում կարանտինի մեջ։
«Ինքնամեկուսացումն ինքնանպատակ չէ։ Դա տվյալ անձի առողջական վիճակին հետամուտ լինելու գործընթաց է, ինչպես նաև վերջինիս շրջապատողների համար անվտանգ միջավայր ստեղծելու հնարավորություն։ Իսկ եթե մասնագետների կողմից առաջարկվում է աշխատանքի չգնալ, մնալ տանը, գործատուներին կոչ եմ անում այդ անձանց հնարավորություն ստեղծել 14 օր տանը մնալու»,–ասում է Թորոսյանը` նշելով, որ ինքնամեկուսացման մեջ մնալը նաև ինքնագիտակցության և սեփական պատասխանատվության խնդիր է։ Անհրաժեշտության դեպքում բժիշկները դիմում են նաև իրավապահներին, որպեսզի օգնեն իրենց։ Ինքնամեկուսացումը ու նման հսկողությունն ընդունված է ամբողջ աշխարհում։
Թորոսյանի խոսքով` Հայաստանը, աշխարհի շատ երկրների նման, հնարավոր բոլոր աշխատանքներն իրականացնում է թե՛ հիվանդների արագ հայտնաբերման, թե՛ շփված անձանց հայտնաբերման, թե նրանց բուժման համար։ «Ամեն ինչ արվում է կայուն համաճարակային իրավիճակը և առողջապահական համակարգի անխափան աշխատանք ապահովելու համար»,–հավաստիացրեց մասնագետը։
Հիշեցնենք` Հայաստանում կորոնավիրուսով վարակվելու առաջին դեպքի մասին հայտնի դարձավ մարտի 1-ի վաղ առավոտյան. վարակվածը 29-ամյա տղամարդ է: Նա Իրանից Հայաստան է ժամանել փետրվարի 28-ին: Ավելի ուշ հայտնի դարձավ, որ 31 հոգու մեկուսացրել են Ծաղկաձորի «Գոլդեն փելես» հյուրանոցում։ Նրանք բոլորը կորոնավիրուսով վարակված տղամարդու հետ ինքնաթիռում շփված քաղաքացիներ են:
Երեկ` մարտի 11-ին, ՀՀ վարչապետ Նիկոլ Փաշինյանը հայտարարեց, որ Հայաստանում կորոնավիրուսի երեք նոր դեպք է բացահայտվել։ Երկուսը ՀՀ քաղաքացի են (45 և 27 տարեկան), մեկը՝ Իտալիայի (51 տարեկան). նա աշխատում է Հայաստանում։ Երեքն էլ ժամանել են Իտալիայից: Այսօր հայտնի դարձավ, որ նրանցից մեկը Էջմիածնի բնակիչուհի է, որը 10 օր առաջ է Հայաստան ժամանել և հասցրել է մասնակցել հուղարկավորության և նշանադրության արարողությունների։ Կորոնավիրուսով վարակվածների հետ շփվածներից 10-ին մեկուսացրել են «Գոլդեն փելեսում»։