ԵՐԵՎԱՆ, 12 մարտի — Sputnik. ՀՀ մի շարք պատվիրակությունների արտասահմանյան գործուղումներ չեղարկվել են։ Որոշումներն ուժը կորցրած են ճանաչվել ՀՀ վարչապետ Նիկոլ Փաշինյանի երեկվա և այսօրվա որոշումներով:
Վարչապետի մարտի 11–ի որոշմամբ` չեղարկվել է փոխվարչապետ Տիգրան Ավինյանի, աշխատանքի և սոցիալական հարցերի նախարար Զարուհի Բաթոյանի, պատգամավոր Սոնա Ղազարյանի և այլոց` Ամերիկայի Միացյալ Նահանգներ գործուղելու մասին որոշումը։ Նրանք ԱՄՆ պետք է մեկնեին Միավորված ազգերի կազմակերպության Կանանց կարգավիճակի հանձնաժողովի 64-րդ նստաշրջանին մասնակցելու նպատակով:
Ուժը կորցրած է ճանաչվել նաև Լենա Նանուշյանին Դանիայի Թագավորություն գործուղելու մասին որոշումը։ ՀՀ առողջապահության նախարարի տեղակալ Լենա Նանուշյանը գործուղվելու էր Դանիայի Թագավորություն (Կոպենհագեն)՝ Առողջապահության համաշխարհային կազմակերպության եվրոպական տարածաշրջանի 27-րդ մշտական կոմիտեի երրորդ նստաշրջանին մասնակցելու նպատակով:
Ինչպես արդեն տեղեկացրել էինք, ուժը կորցրած է ճանաչվել արդարադատության նախարար Ռուստամ Բադասյանին և նախարարի տեղակալ Քրիստինե Գրիգորյանին Ֆրանսիայի Հանրապետություն գործուղելու մասին որոշումը:
Կիրակի օրը ևս մեկ չվերթ է սպասվում Իտալիայից. կառավարությունում քննարկել են` ինչ անել
Ռուստամ Բադասյանը և Քրիստինե Գրիգորյանը մարտի 25-28-ը գործուղվելու էին Փարիզ՝ Արևելյան Եվրոպայում ու Կենտրոնական Ասիայում Հակակոռուպցիոն ցանցի բարձր մակարդակի, ինչպես նաև Արևելյան Եվրոպայում և Կենտրոնական Ասիայում Հակակոռուպցիոն ցանցի ղեկավար խմբի հանդիպումներին մասնակցելու նպատակով:
Ինչպես հայտնի է, այս օրերին նոր տիպի կորոնավիրուսի տարածումը կանխելու համար աշխարհում բազմաթիվ միջոցառումներ են չեղարկվում, ավիաընկերությունները հայտնում են չվերթների ժամանակավոր դադարեցման մասին, որոշ երկրներ փակում են մուտքը այլ երկրների քաղաքացիների առաջ: