ԵՐԵՎԱՆ, 5 մարտի - Sputnik. Ազգային ժողովն առաջին ընթերցմամբ ընդունեց «Դատական օրենսգիրք» սահմանադրական օրենքում փոփոխություններ և լրացումներ կատարելու մասին փաթեթն առաջին ընթերցմամբ ընդունելու մասին հարցը։ Նախագծին կողմ քվեարկեց 85, դեմ՝ 35, ձեռնպահ՝ 1 պատգամավոր։
Մինչ քվեարկությունը «Լուսավոր Հայաստան» խմբակցության ղեկավար Էդմոն Մարուքյանը հայտարարել էր, որ խմբակցությունը դեմ է քվեարկելու նախագծին, և մինչև երկրորդ ընթերցում պատրաստվում է որոշ առաջարկներ անել։
«Եթե դրանք ընդունվեն ու դատավորների անկախության վերաբերյալ մեր ունեցած մտահոգությունները փարատվեն, հաջորդ անգամ կողմ կքվեարկենք»,- ասել էր Մարուքյանը։
Անփորձ երիտասարդ դատավորներ ու կախյալ համակարգ. ընդդիմությունը չի վստահում նոր օրենքին
«Ապօրինի ծագում ունեցող գույքի բռնագանձման մասին» օրենքի նախագծին ևս ընդդիմությունը քվեարկեց որոշ վերապահումներով։
«Բարգավաճ Հայաստան» խմբակցության անդամ Արման Աբովյանը հայտարարեց, որ ԲՀԿ-ն ձեռնպահ է քվեարկելու։
«Լուսավոր Հայաստան» խմբակցության ղեկավար Էդմոն Մարուքյանը հայտնեց, որ իրենք այս անգամ կողմ կքվեարկեն, բայց վերապահումով։
«Մինչև երկրորդ ընթերցում մենք հանդես կգանք շեմի փոփոխության հետ կապված առաջարկով»,- ասաց Մարուքյանը։
Նախագիծն առաջին ընթերցմամբ ընդունվեց 100 կողմ, 2 դեմ և 18 ձեռնպահ ձայներով։
Նշենք, որ երկու նախագծերում առկա են սահմանադրական օրենքներ, հետևաբար, դրանց հաստատման համար անհրաժեշտ էր ստանալ պատգամավորների ընդհանուր թվի 3/5-րդի կողմ ձայները, ինչը և տեղի ունեցավ։
Պետականը սեփականի հետ չխառնենք. Փաշինյանը ցույց է տվել Սերժ Սարգսյանի նախկին առանձնատունը
Նշենք, որ արդարադատության նախարար Ռուստամ Բադասյանը երեկ՝ մարտի 4-ին, ԱԺ-ում «Ապօրինի ծագում ունեցող գույքի բռնագանձման մասին» օրենքի նախագիծը ներկայացնելիս ասել էր, որ դրա ընդունումից հետո ՀՀ ներկա ու նախկին (1990թ-ից սկսած) պաշտոնյաների` 25 մլն դրամը կամ 50 000 դոլարը գերազանցող գույքը կհամարվի պոտենցիալ ապօրինի ձեռք բերված։
Ուստի պաշտոնյաները ստիպված կլինեն հիմնավորել իրենց ձեռք բերած թանկարժեք գույքի օրինական ծագումը։
Օրենքը ՀՀ շարքային քաղաքացիների նկատմամբ կիրառելի չէ, դրա շահառուները լինելու են բացառապես նախկին ու ներկա պաշտոնյաները։
Սյունիքի նախկին մարզպետն ու իր վարորդը փորձում են օրինականացնել ապօրինի հողն ու տունը