ԵՐԵՎԱՆ, 3 մարտի — Sputnik. Հայաստանը միանում է ԱՊՀ հակաահաբեկչական պայքարին, բայց Ադրբեջանին տեղեկատվություն տրամադրելու պարտավորություն չի ստանձնում։
ԱԱԾ–ն մաքրվում է դավաճաններից. կառույցի ղեկավարը` Փաշինյանի հայտարարության մասին
ԱԱԾ տնօրենի պաշտոնակատար Էդուարդ Մարտիրոսյանն այսօր ԱԺ–ում նման հայտարարություն արեց` մեկնաբանելով «Անկախ պետությունների համագործակցության շրջանակում ահաբեկչության 7 ծայրահեղականության այլ բռնի դրսևորումների, ինչպես նաև դրանց ֆինանսավորման դեմ պայքարի ոլորտում տեղեկության փոխանակման մասին» համաձայնագիրը:
«Համագործակցությունը ԱՊՀ բոլոր երկրների հետ մեզ համար որևէ պարտավորություն չի ենթադրում, եթե դա հակասում է ՀՀ պետական շահերին ու օրենսդրությանը։ Մենք իրավասու ենք չտրամադրել տվյալներ այդ պետությանը, եթե այդ տվյալներն իմ նշած շրջանակներում են։ Այդ դրույթն ամրագրված է համաձայնագրի 8-րդ կետում»,– ասաց ԱԱԾ ղեկավարը։
Միաժամանակ համաձայնագրով կարգավորվում է նաև Հայաստանի տրամադրած տեղեկությունները որևէ երրորդ երկրի կողմից Ադրբեջանին փոխանցվելու հավանականությունը։
ԱԱԾ տնօրենի պաշտոնակատարի խոսքով` առանց ՀՀ գրավոր համաձայնության` Հայաստանին վերաբերող որևէ տեղեկատվություն այլ երկրի փոխանցվել չի կարող։
Այդուհանդերձ, ըստ Մարտիրոսյանի, ԱՊՀ շրջանակներում մինչ օրս Հայաստանն ու Ադրբեջանը նման խնդիր չեն ունեցել, որևէ կարևոր տեղեկատվության փոխանակման հարց չի ծագել։
Ինչ վերաբերում է ԱՊՀ անդամ այլ երկրների հետ համագործակցությանը, Մարտիրոսյանը նշեց, որ մինչ օրս եղել են դեպքեր, երբ որևէ երկրից հարցում է ստացվել, բայց հիմքերը բավարար չեն եղել տվյալ անձանց այդ երկրին արտահանձնելու համար։
Հակաահաբեկչական պայքարն ԱՊՀ շրջանակներում ղեկավարվում է Մոսկվայում գտնվող հակաահաբեկչական կենտրոնի կողմից, որտեղ Հայաստանն ունի մշտական ներկայացուցիչ։
Նշենք, որ «Անկախ պետությունների համագործակցության շրջանակում ահաբեկչության և ծայրահեղականության այլ բռնի դրսևորումների, ինչպես նաեւ դրանց ֆինանսավորման դեմ պայքարի ոլորտում տեղեկության փոխանակման մասին» համաձայնագիրը ստորագրվել է դեռևս 2017 թվականի նոյեմբերի 3-ին։
Այն իրավական ուժ կստանա Աժ–ում վավերացվելուց ու Սահմանադրությանը չհակասող ճանաչվելուց հետո։