ԵՐԵՎԱՆ, 3 մարտի – Sputnik. ԲՀԿ առաջնորդ Գագիկ Ծառուկյանը ԱԺ-ում լրագրողների հետ ճեպազրույցում ասաց, որ բժշկական դիմակի կարիք չունի։
«Ծառուկյանը դրա կարիքը չունի։ Բարի մարդկանց այդ վիրուսը չի կպնում», - ասաց նա։
Իսկ վարակի դեմ ՀՀ կառավարության ձեռնարկած միջոցներից Ծառուկյանը դժգոհ է։
«Մեկ ամիս առաջ պետք է հանձնարարություն լիներ հիվանդանոցների սեփականատերերին ու դեղատներին, որ իրենց անհրաժեշտ դեղորայքով ու դիմակներով ապահովեն։ Հիմա գրիպը եկել է հասել մեր դուռը, նայում ես՝ դիմակներ չկան, դեղորայք չկա»,- ասաց նա։
ԲՀԿ առաջնորդի համոզմամբ` իշխանությունը ժամանակին ականջալուր չեղավ այդ խորհրդին, հիմա էլ փորձում է արդարանալ։
Իրանի հետ սահմանին գործող երկշաբաթյա սահմանափակումը կերկարաձգվի. Թորոսյան
Վարակի կասկածանքով մարդկանց Ծաղկաձոր տեղափոխելու մասին որոշումը ևս Ծառուկյանը չի ողջունում։ Նրա խոսքով` այն մեծ հարված է հասցրել զբոսաշրջային բիզնեսին։
«Գնացեք Ծաղկաձոր՝ ամբողջը դատարկ է։ Հենց ասել են, բոլոր պատվերները չեղարկել են, եղածներն էլ թողեցին, գնացին»,- դժգոհեց Ծառուկյանը։
Հայաստանում կորոնավիրուսով վարակվելու առաջին դեպքի մասին հայտնի դարձավ մարտի 1-ի վաղ առավոտյան. վարակվածը 29-ամյա տղամարդ է: Նա Իրանից Հայաստան է ժամանել փետրվարի 28-ին:
Կորոնավիրուսը լուրջ չենք ընդունում, կամ ինչ կատակներ են ծնվել դրա «ժամանումից» հետո
Ավելի վաղ ՀՀ առողջապահության նախարար Արսեն Թորոսյանը հայտնել էր` 32 մարդ մեկուսացվել է Ծաղկաձորի «Գոլդեն փելես» հյուրանոցում։
Նրանք բոլորը կորոնավիրուսով վարակված տղամարդու հետ ինքնաթիռում շփված քաղաքացիներ են: Ինքնաթիռի մյուս ուղևորների նկատմամբ սահմանվել է 14-օրյա տնային հսկողություն. նրանց հորդորել են տնից դուրս չգալ։
ՀՀ վարչապետ Նիկոլ Փաշինյանն էլ Facebook-ի իր էջում հայտնել էր կորոնավիրուսով վարակված լինելու կասկածով հետազոտված նախ 9, հետո ևս 8 քաղաքացիների թեստավորման պատասխանները, որոնք բոլորն էլ բացասական են։
Այսօր արդեն Facebook-յան ուղիղ եթերի ժամանակ Առողջապահության նախարար Արսեն Թորոսյանը հայտնեց, որ Իրանի հետ հաղորդակցությունը ժամանակավորապես սահմանափակելու մասին որոշումը երկարաձգելու անհրաժեշտություն է առաջացել. սահմանափակումը կերկարաձգվի մինչև 2020 թվականի մարտի 24-ը ներառյալ։
Հիշեցնենք` փետրվարի 24-ին Հայաստանի կառավարությունը հայտարարեց Իրանի հետ ցամաքային սահմանը երկու շաբաթով փակելու մասին։ Օդային հաղորդակցության մասով ևս որոշակի սահմանափակումներ են կիրառվել, սակայն Հայաստան ժամանած Իրանի բոլոր քաղաքացիները կկարողանան հետ վերադառնալ, իսկ Իրանում գտնվող ՀՀ քաղաքացիները` Հայաստան գալ։