ԵՐԵՎԱՆ, 1 մարտի — Sputnik. Դասերը մեկ շաբաթով կհետաձգվեն` կորոնավիրուսով վարակման կանխարգելման համար. Facebook–յան ուղիղ եթերի ժամանակ տեղեկացրեց ՀՀ վարչապետ Նիկոլ Փաշինյանը։
Նշենք՝ Հայաստանում կորոնավիրուսով վարակման մեկ դեպք է գրանցվել. Իրանից Հայաստան ժամանած 29-ամյա տղամարդու մոտ հայտնաբերվել է կորոնավիրուս։ Նա և իր հետ շփված 32 անձինք մեկուսացվել են Ծաղկաձորի «Գոլդեն փելես» հյուրանոցում։
«Սա անում ենք, որպեսզի ծնողները չանհանգստանան, մենք էլ ժամանակ ունենանք հասկանալու` հետագայում ինչ ենք անում։ Սակայն կյանքը դադարեցնել չենք կարող` տրանսպորտն աշխատում է, մետրոն` նույնպես։ Մյուս կողմից, մենք նմա՞ն իրավիճակներ ենք հաղթահարել. կորոնավիրուսն ո՞ւմ շունն է, որ չհաղթահարենք»,–ասաց Փաշինյանը։
Նա նշեց նաև, որ լուրեր են ստանում, թե Ծաղկաձորի հյուրանոցներում համարներ պատվիրված քաղաքացիները չեղարկում են պատվերը, իսկ Ծաղկաձորում գտնվողները` հետ են վերադառնում։
Նրա խոսքով` կարիք չկա խուճապի և նման քայլերի, քանի որ Ծաղկաձորում համաճարակային վիճակն ավելի վատը չի դարձել։ Վարչապետը նշեց` վարակված տղամարդու հետ շփվածների մոտ կորոնավիրուսի ախտորոշումը 50/50 է։ Փաշինյանն ասաց, որ Ծաղկաձորը ռիսկային գոտի չէ, և մյուս հյուրանոցներում կյանքը պետք է բնականոն հունով շարունակվի։
Վարչապետի հավաստմամբ՝ այս պահին անգամ ծանր վիճակում գտնվող կամ էլ դրա հետևանքով բուժվող հիվանդ չկա։
Անդրադառնալով Իրանի հետ սահմանի փակմանը` Փաշինյանը նշեց, որ չեն կարող ՀՀ քաղաքացիների մուտքն արգելել Հայաստան։
Նա խոստացավ քիչ անց այցելել մի քանի դեղատներ և ստուգել` դիմակներ կա՞ն, թե՞ ոչ։
ՀՀ ԿԳՄՍ նախարար Արայիկ Հարությունյանը ևս Facebook-ի ուղիղ հեռարձակման միջոցով տեղեկացրեց, որ գարնանային արձակուրդները, որոնք նախատեսված էին մարտի վերջին կտեղափոխվեն մարտի 2-8-ը:
«Այս ընթացքում իրավիճակը կուսումնասիրենք և շաբաթվա վերջին նոր տեղեկություն կտանք: Կարծում ենք՝ մի շաբաթը բավական է լարվածությունը թոթափելու համար: Հրամանը առավոտյան կստանան բոլոր ուսումնական հաստատությունները»,-ասաց նախարարը՝ հավելելով, որ խոսքը վերաբերում է և՛ նախադպրոցական հաստատություններին, և՛ դպրոցներին, և՛ քոլեջներին ու բուհերին:
Բուժհաստատությունները դիմակ և արտահագուստ ունեն. Թորոսյանը դիմում է հայ գործարարներին
Հիշեցնենք, որ այսօր ՀՀ առողջապահության նախարար Արսեն Թորոսյանը մամուլի ասուլիսով էր հանդես եկել ու հայտնել` 32 մարդ է մեկուսացվել Ծաղկաձորում։ Մեկուսացվել են նրանք, ովքեր շփվել են կամ էլ մոտ են եղել կորոնավիրուսով վարակված տղամարդուն։