ԵՐԵՎԱՆ, 1 մարտի — Sputnik. ՀՀ վարչապետ Նիկոլ Փաշինյանն այցելեց Մյասնիկյանի արձանի մոտ` հարգանքի տուրք մատուցելու Մարտի 1-ի զոհերի հիշատակին։ Փաշինյանի հետ էին նաև կառավարության անդամները։
Նրանք ծաղիկներ խոնարհեցին Մյասնիկյանի արձանի մոտ։ Այնտեղ էին նաև Մարտի 1–ի զոհերի հարազատները, որոնց հետ զրուցեց Փաշինյանը։
Նշենք, որ այսօր «Քաղաքացիական պայմանագիր» կուսակցությունը Մարտի 1-ի զոհերի հիշատակին նվիրված երթ էր պլանավորել, որը, սակայն, չեղարկվել է՝ Հայաստանում այսօր գրանցված կորոնավիրուսի հիվանդացության առաջին դեպքի պատճառով։
Հիշեցնենք` 2008 թվականի փետրվարի 24-ին Հայաստանի ԿԸՀ-ն հայտարարել էր, որ ՀՀ նախագահական ընտրություններում հաղթել է Սերժ Սարգսյանը։ Լևոն Տեր Պետրոսյանի կողմնակիցները պահանջում էին վերահաշվարկել քվեները։ Մարտի 1-ի գիշերը Ազատության հրապարակում ոստիկանական ուժերը օպերատիվ-հետախուզական գործողություններ էին իրականացրել «տեղանքը ստուգելու» համար և հազարավոր ցուցարարների հեռացրել էին հրապարակից։
«Քաղաքացիական պայմանագիրը» չեղարկել է Մարտի 1-ի զոհերի հիշատակին նվիրված երթը
Մարտի 1-ի երեկոյան ԶՈՒ և ոստիկանության ստորաբաժանումները Երևանի կենտրոնական փողոցներում զենքի, պայթուցիկ սարքերի և հատուկ միջոցների օգնությամբ ցուցարարներին ցրելու համար հատուկ գործողություններ էին իրականացրել։ Հարյուրավոր մարդիկ վնասվածքներ էին ստացել, մահացել էին 8 քաղաքացիական անձ և 2 ոստիկան։